Basagereziondo

Basagereziondoa (edo basagerezia), edo batzuetan gereziondoa soilik (edo gerezia), (Prunus avium) Cerasus azpigeneroko zuhaitza da. Gingondoarekin batera (Prunus cerasus), gereziak emateko landatzen diren barietateen jatorria da.

Basagereziondo
Hostoak eta fruituak Irudi gehiago
Iraute egoera
Arrisku txikia  (IUCN 3.1)
Sailkapen zientifikoa
Erreinua	Plantae
Ordena	Rosales
Familia	Rosaceae
Leinua	Amygdaleae
Generoa	Prunus
Espeziea	Prunus avium L.
Banaketa mapa
Datu orokorrak
Gizakiak ateratzen dizkion produktuak	gerezi, sweet cherry (en) , cherry pit (en) , cherry pit oil (en) eta cherry juice (en)
Genomaren kokapena	plants.ensembl.org…

Prunus terminoa basaranaren izena da; Avium terminoak, berriz, txoriena adierazten du: txoriek gogoz jaten dituzte gereziondoen fruituak.

Ezaugarriak

Hosto erorkorreko zuhaitza da, eta 30 m garai izan daiteke.

Zurtoina – Azala

Enbor lodia du, eta azala, arre-gorrixka eta distiratsua, zerrenda horizontaletan askatzen da. Gaztaina-kolorekoa edo gorrixka da egurra, eta gogorra eta astuna.

Hostoak

Obalak eta horzdunak dira hostoak; bi guruin gorri dituzte txortenarekin lotzeko puntuan.

Loreak

Hostoak baino lehen hazten dira loreak, martxoaren amaieran edo apirilean; zuriak dira, eta multzo txikitan -ginbeletan- agertzen dira.

Fruituak

Drupa gorri jangarria da fruitua: gerezia. Maiatzetik uztailera heltzen da.

Habitata

Ia Europa osoan, Asia mendebaldean eta Afrika iparraldean dago hedatuta. Oso ohikoa da Euskal Herriko isurialde kantauriarrean.

Lurzoru fresko eta sakonetan bizi ohi da: harizti, pagadi eta baso mistoetan.

Erabilera

Zura oso estimatua da ebanisterian. Estimu handiko mahai-frutak dira gereziak, eta infusio diuretikoak egiten dira txortenekin

Ikus, gainera

• Itsasuko gerezi beltza

Erreferentziak

• Artikulu honen edukiaren zati bat Botanika.wikispaces.com webgunetik hartu da, CC BY-SA 3.0 lizentziapean.

• Datuak: Q165137
• Multimedia: Prunus avium / Q165137
• Espezieak: Prunus avium