Quebeceko eskualde administratiboak

Quebeceko eskualde administratiboak (frantsesez Régions administratives du Québec) Ipar Amerikako herrialde honetako lehen mailako banaketa administratiboa osatzen duten 17 eskualdeak dira.

1966ko martxoaren 29an sortu eta 1987ko abenduaren 22an berrantolatu ziren. Région deitu baino lehen district ("barruti") deituak ziren.

Antolakuntza

Eskualdeak kudeatzen dituzten taldeak bi denboratan antolatzen dira. Lehenik Quebeceko gobernuak arlo sozioekonomiko desberdinetako pertsonalitate batzuk izendatzen ditu eta horrela "Hautetsien eskualdeko konferentzia" (Conférence régionale des élus, CRÉ) sortzen da. Egitura honek gobernu nazionalari eskualdearen gaineko kontuetan aholkuak eman eta proiektuak garatzeko ardura du; aldiz, ez du erabakiak hartzeko botererik eta egin beharrekoa tokiko udalerri (municipalité) eta udalerriak biltzen dituen "Eskualdeko konderriko udalerriekin" (Municipalité régionale de comté, MRC) kolaboratu eta adostu behar du ezinbestean.

Bestetik eskualde bakoitzak bere gobernua du, udalerrietako ordezkariek osatzen dutena. Quebeceko gobernuak eskualdekoaren onespena -edo hiritarrena, adostasunik ez balego- behar du eskualdearen konpetentziei lotutako egitasmoak aurrera atera baino lehen.

17 eskualdeak

Quebec 17 eskualdetan banatuta dago. Ez dute hiriburu ofizialik eta udalerri nagusia aipatzen da. Quebeceko lurraldearen ezaugarriengatik azaleran eta biztanle kopuruan izugarrizko desberdintasunak daude haien artean.

Eskualde bakoitzak kode baten moduko zenbaki finkoa du, hainbat argitalpen eta agiritan agertzen dena.

Zkia.	Eskualde administratiboa	Biztanleria (2010)	Azalera (km²)	Dentsitatea (bizt./km²)	Hiri nagusia
01	Bas-Saint-Laurent	202.299	22.405	9,0	Rimouski
02	Saguenay–Lac-Saint-Jean	275.679	104.035	2,6	Saguenay
03	Capitale-Nationale	687.672	19.286	35,7	Quebec Hiria
04	Mauricie	263.264	39.748	6,6	Trois-Rivières
05	Estrie	307.264	10.187	30,2	Sherbrooke
06	Montréal (Montreal)	1.887.983	504	3.746,0	Montreal
07	Outaouais	357.667	32.841	10,9	Gatineau
08	Abitibi-Témiscamingue	146.636	64.700	2,3	Rouyn-Noranda
09	Côte-Nord	96.508	300.281	0,3	Sept-Îles
10	Nord-du-Québec	40.637	718.229	<0,1	Chibougamau
11	Gaspésie–Îles-de-la-Madeleine	94.813	20.937	4,5	Gaspé
12	Chaudière-Appalaches	405.473	15.128	26,8	Lévis
13	Laval	391.636	245	1.598,5	Laval
14	Lanaudière	461.526	13.528	34,1	Terrebonne
15	Laurentides	543.874	21.563	25,2	Saint-Jérôme
16	Montérégie	1.432.243	11.114	128,9	Longueuil
17	Centre-du-Québec	231.892	6.926	33,5	Drummondville

Berezitasunak

Bi eskualderen kasuetan (Montérégie eta Nord-du-Québec) hiruna eremutan banatuta daude eta horietako bakoitzak eskualde administratibo bati dagokion egitura (Conférence régionale des élus, CRÉ edo baliokidea) du.

Montérégie, bere biztanleria handiagatik hiru eskualdetan banatuta dago:

Agglomération de Longueuil (Rive-Sud de Montréal edo "Montrealeko hegoaldeko ibarra" izenez ezaguna).
Montérégie-Est, ekialdea.
Vallée-du-Haut-Saint-Laurent (Suroît edo "Hego-mendebaldea" izenez ezaguna).

Bakoitzaren hiri nagusia Longueuil, McMasterville eta Salaberry-de-Valleyfield da, hurrenez hurren.

Nord-du-Québec jatorriko herriek (kasu honetan inuit eta creeek) gehiengoa osatzen duten eskualde bakarra da eta izugarri handia da; hori dela eta hiru eremutan banatuta dago:

Jamésie "zurien" gehiengo demografikoaren menpean legokeen lurraldearen zatirik handiena da; bertan munduko udalerririk handientzat jotzen den Baie-James dago. CRÉko egoitza Matagamin dago.
Eeyou Istchee, creeak bizi diren herriek osatua; Creeen Kontseilu Handiaren egoitza Nemaskan dago.
Nunavik (Nouveau-Québec, "Quebec berria" deitzen zena), inuiten lurraldea; Kativik izena duen administrazioaren egoitza Kuujjuaqen dago.

Eskualdeen banaketak

Eskualdearen (Quebeceko 1. mailako banaketa administratiboa) eta udalerriaren (3. maila) artean udalerri batzuk biltzen dituzten egiturak daude, mankomunitate, herri, hiri edota aglomerazio elkargoen antzeko funtzioak dituztenak:

"Eskualdeko konderriko udalerriak" (Municipalité régionale de comté, MRC); 89 dira.
MRCen baliokideak direnak (Territoire équivalent); Nord-du-Québeceko hirurak, gune metropolitarrak eta hiri nagusiak, Les Îles-de-la-Madeleine uhartedia. Beste 14 dira.

Izen aldaketak

Cantons-de-l'Est (1966-1981): 1981ean Estrie izena eman zitzaion eskualde honetako bihotzari; hala ere, eskualde zaharreko Arthabaska, Brome, Compton, Drummond, Frontenac, Mégantic, Missisquoi, Shefford, Stanstead eta Wolfe kantonamenduak (cantons) inguruko beste hiru eskualdetan sartu ziren.
Nord-Ouest (1966-1981): 1981ean Abitibi-Témiscamingue bihurtua.
Nouveau-Québec (1966-1987): 1987ko abenduaren 22an Nord-du-Québec bihurtua.
Québec: 1999ko abenduaren 15ean Capitale-Nationale bihurtua.
Trois-Rivières (1966-1987): 1987ko abenduaren 22an Mauricie–Bois-Francs bihurtua.

Banatutako eskualdeak

Lehen fasean (1966) lurraldea 10 eskualdetan banatu zen, lehen 10 kodeak daramatzatenetan hain zuzen (arestian aipatu izen aldaketak kontuan hartuz).

Bigarrenean (1987) eskualde batzuk banatzeari eta zenbait muga aldaketa egiteari ekin zitzaion, oreka bilatu nahian. Horren ondorioak hauexek izan ziren:

Bas-Saint-Laurent–Gaspésie desagertu eta egungo Bas-Saint-Laurent (01 kodea mantenduta) osoa eta Gaspésie–Îles-de-la-Madeleineko (11 kodea) osatu ziren.
Quebec Hirian eta bere metropoli gunean zentratutako eskualdea bitan banatu zen: Quebec (1999tik Capitale-Nationale, 02 kodea gorde zuena) eta Chaudière-Appalaches (12 kodea).
Montrealen eta bere metropoli gunean zentratutako eskualdea bostetan banatu zen: Montreal (06 kodea gordeta), Laval (13), Lanaudière (14), Laurentides (15) eta Montérégie (16); azken honek bere Estrierekiko mugak aldatu zituen.

Azkenik Mauricie–Bois-Francs 1997ko uztailaren 30ean desagertu zen eta bere lurrek Mauricie eta Centre-du-Québec osatu dituzte.

Ikus, gainera

Quebec

Kanpo estekak

(Frantsesez) MAMROT Quebeceko udal, eskualde eta lurralde antolakuntzarako ministerioa (ministère des Affaires municipales, des Régions et de l'Organisation du territoire du Québec).

Datuak: Q55998242
Multimedia: Regions of Quebec / Q55998242