Hannah Arendt

Hannah Arendt

Hannah Arendt (Hannover, Alemania, 1906ko urriaren 14a - New York, Ameriketako Estatu Batuak, 1975eko abenduaren 4a) teoria politikoari buruzko pentsalari eta idazle bat izan zen. Lan gehiena boterea aztertzen eman zuen, bereziki politika, autoritatea eta totalitarismoa ikertu zituen. Askatasuna eta berdintasuna, lehiakide ez ezik, guztiz osagarritzat zituen.

Bizitza

Hannah Arendt jatorri juduko familia batean jaio zen, Linden hirian (Hannover hiriko zatia), Alemanian. Haurtzaroa Kaliningraden igaro zuen. Filosofia ikasi zuen Martin Heideggerren laguntzarekin. Harekin harreman luzea izan zuen, nahiz eta Heidegerrek ondoren nazien aldeko jarrera agertu zuen.

Heideggerrekin haserretu ondoren, Heidelbergera joan zen bizitzera. 1929an Günther Sternekin ezkondu zen; 1937an dibortziatu ziren. Nazien garaipenaren ondoren, nazien Gestapo polizia politikoak ikertu egin zuen eta arriskuan zegoenez Parisera erbesteratu zen. Frantzian zela, juduei laguntzeko taldeetan parte hartu zuen. Gurseko kontzentrazio-esparruan atxilotuta egon arren ihes egitea lortu zuen. Naziek Frantziako iparraldea (Paris barne) hartu ondoren, Estatu Batuetara ihes egin zuen bere ama eta bigarren senarrarekin (Heinrich Blücher poeta, filosofo eta marxista alemaniarra). Bertan, New Yorkeko komunitate judu-alemaniarrean parte hartu zuen.

Bigarren Mundu Gerra amaitu ostean, Alemaniara itzuli zen. Bertan, "Youth Aliyah" taldearekin lan egin zuen, Holokaustoan hildako juduen seme-alabak Palestinara eramateko. 1950ean AEBetako hiritar bihurtu zen eta ordutik aurrera bertako hainbat unibertsitatetan irakasle aritu zen.

69 urterekin hil zen, 1975ean, eta New Yorkeko Bard Collegen hilobiratu zuten.