Ennis

Ennis; Inis
	Irlanda
Administrazioa
Estatua	Irlandako Errepublika
Probintzia	Munster
Konderria	Clare konderria
Geografia
Koordenatuak	52°50′47″N 8°58′51″W / 52.8463°N 8.9807°W
Altuera	3 metro
Demografia
Biztanleria	25.316 (2011)
Bestelako informazioa
Telefono aurrizkia	65

Ennis (irlanderaz Inis), Irlandako mendebaldean dagoen dagoen udalerri bat da, Clare konderrian. Konderri honetako hiriburua izateaz gain Irlandako Errepublikako seigarren hiririk handiena da.

Ennis udalerria Shannon aireportutik 19 kilometro eskasetara dago, baita Moherreko amildegiak, The Burren eremua, Dromoland gaztelua edota Bunratty gaztelua turismo gunetatik oso hurbil ere. 2005 urtean Irlandako hiri garbiena izendatu zuten. Ennisek 25.360 biztanle ditu (2011).

Izena

Irlanderazko Inis izenak "uhartea" esan nahi du, izan ere Fergus ibaiaren Clonroad uhartean altxaturiko frantziskotar monasterio baten inguruan sortu baitzen.

Historia

Thomond Erresumako agintari zen O'Brian familiak XII mendean Limerick utzi eta Clonroad uhartean beren egoitza eraiki zuten. 1240an lurrak eman zizkien frantziskotarrei bertan monasterioa altxa zezaten. Inguruko ikasleak monasteriora etortzen ziren Teologia ikasketak egitera eta inguruan herria eratzen hasi zen. Harresirik ez zeukanez merkatari katolikoak aske ziren bertara etortzeko, gainontzeko herri hesituetan ez bazuten bizitzeko baimenik lortzen. Honek herriari garapen handia eman zion, harik eta XVI mendeko Erreforma Protestantearen eraginek monasterioak itxi ziren arte.

Elisabet I.a Ingalaterrakoaren erregealdian Clare konderri izendatua izan zen eta Ennis aukeratu zuten hiriburu izateko. 1610tik aurrera feriak eta merkatua izateko eskubideak jaso zituen.

Ondasun nabarmenak

Alde zaharra: Erdi Aroko kale estuek osatzen dute Ennisen alde zaharra eta muturrean San Pedro eta San Pabloren katedrala dago. Gaur egun hainbat kale peatonalizatu dituzte.
Dromoland gaztelua: Ennistik 13 kilometro hego-ekialdera dagoen Newmarket-on-Fergus herriko gaztelu ederra da. 1835ean eraiki zuten.
Bunratty gaztelua: Mac Namara familiak 1425ean eraikitako gaztelua da, hau ere Ennistik gertu, Bunratty herrian hain zuzen ere.

Kirola

Clare konderriko futbol gaeliko eta hurling kiroletako Clare GAA taldeak udalerri honetako Cusack Park estadioan egoitza eta jokalekua du.

Fleadh Nuah, irlandar kulturaren jaialdia

Urtero, maiatzean, udalerri honetan irlandar kultura eta musika herrikoia sustatzea helduru duen Fleadh Nua jaialdia izaten da.

Hiritar ezagunak

William Mulready (1786-1863), margolaria.
Harriet Smithson (1800-1854), aktorea.
Tony MacMahon (1939-), akordeoi-jotzailea, irrati esataria eta telebista aurkezlea.
Alan Griffin (1952-2023), Euskal Herrian bizi izandako folk musikaria, Alboka taldeko kidea izandakoa.
Kieran Hanrahan (1957-), irlandar banjo tenore-jotzailea eta irrati esataria.