Herriko Alderdi Sozialista Iraultzailea

Herriko Alderdi Sozialista Iraultzailea (HASI) 1977an sortutako alderdi politiko independentista eta sozialista marxista izan zen. Bere jarduera-eremua Hego Euskal Herria izan zen. KAS erakundeko partaide izan zen eta Herri Batasunaren sorreran parte hartu zuen. Zatiketa askoren ostean, 1992ko V. Biltzarrean alderdia desegin eta bere kideak KASera pasa ziren.

Herriko Alderdi Sozialista Iraultzailea
(HASI)
BuruzagiaAlberto Figueroa
(1977-1978)
Txomin Ziluaga
(1978-1987)
Sorrera1977[1]
Desegitea1992[2]
Ideologia politikoaMarxismo-leninismoa
Abertzaletasuna
Ezker abertzalea
Independentismoa
Sozialismoa
AgerkariaEraiki

Historia aldatu

Euskal Herriko Alderdi Sozialista (EHAS), Eusko Sozialistak (ES) eta zenbait independenteren batze-prozesu baten ondoren sortu zen 1977an. Marxista eta sozialista zen eta Euskal Herri batu eta independentea lortzea zuen helburu. Santi Brouard izan zen alderdiaren fundatzaileetako bat eta lehendakaria. HASI Koordinadora Abertzale Sozialistan sartu zen eta Herri Batasunaren sorreran parte hartu zuen 1978an.

1978ko Lehen Biltzarrean zatiketa gertatu zen HASI barruan: EKIA taldea alderditik irten eta Euskadiko Ezkerran sartu zen. Hirugarren Batzarra egin zenean (1987), ordura arte idazkari nagusi zen Txomin Ziluagak zuzendutako militante-talde bat alderditik bereizi zen. Bosgarren Biltzarrean (1992) alderdia desegitea eta militanteak KASen lanean jarraitzea erabaki zen.[3]

Erreferentziak aldatu

  1. Euskal Herriko Alderdi Sozialista (EHAS) eta Eusko Sozialistak alderdietatik abiatuz.
  2. Alderdia desegin eta militanteak KASera pasa ziren.
  3. Iturria: Harluxet hiztegi entziklopedikoa

Kanpo estekak aldatu