Fernando García Mercadal
Fernando García Mercadal (Zaragoza, Espainia, 1896ko apirilaren 5a - Madril, Espainia, 1985eko otsailaren 3a) arkitektoa izan zen. Madrilgo Arkitekturako Goi Mailako Eskolan egin zituen ikasketak.
| Fernando García Mercadal | |
|---|---|
.jpg) | |
| Bizitza | |
| Jaiotza | Zaragoza, 1896ko apirilaren 5a |
| Herrialdea |  Espainia |
| Heriotza | Madril, 1985eko otsailaren 3a (88 urte) |
| Hezkuntza | |
| Heziketa | Madrilgo Unibertsitate Politeknikoa Espainiako Akademia Erroman |
| Hizkuntzak | gaztelania |
| Jarduerak | |
| Jarduerak | arkitektoa |
| Lan nabarmenak | ikusi
|
| Kidetza | San Fernandoko Arte Ederren Errege Akademia |
Ikasle garaian, Aldamaren estudioan lan egin zuen, baina 1923an Erromako saria irabazi, eta hara joan zen ikasketak sakontzera. Garai hartan egindako bidaietan, Europako modernitatearen aitzindariak eta haien ideiak ezagutu zituen: Le Corbusier, Behrens, Breuer... Europako abangoardiak hobekien ezagutzen zituen arkitektoa izan zen bere garaian, eta berak sartu zuen modernismoa Espainian, 1927an sorterrira itzuli zenean. Aitzindari gisa osatutako bide horretan egindako obra nagusia Zaragozako Goyaren txokoa izan zen (1927).
1930eko hamarraldian egindako beste zenbait lanetan ere zeregin horrekin jarraitu zuen: Burgosko autobus-geltokia (1929); Burgosko Higiene Institutua; Madrilgo Zurbano kaleko eraikin bat (1930); Fabra Coat lantegiaren proiektua (1931), Torrojarekin; Tomas Maebe eskola (1932), Aníbal Álvarezekin. Obra iraultzaile eta berrizaleak egin zituen, oro har, baina baditu askoz ere obra akademizistagoak ere: Bilboko Jesusen Bihotzerako proposamenak; Valentziako Merkataritzako Ateneoa (1927), Emilio Moyarekin eta abar.
1933. urtean Arkitekturako Espainiako Sari Nazionala lortu zuen, Madrilgo Arte Modernoko Museoaren proiektuarekin. Bestalde, garrantzi handiko hirigintza-lanak egin zituen. 1926an Hirigintzako Espainiako Kongresu Nazionalean parte hartu zuen, eta 1929an Madrilen Zabalkunderako Planaren Nazioarteko Lehiaketa prestatzen parte hartu zuen. 1929an Zuazo arkitektoaren estudioan hasi zen lanean, eta han prestatu zen Madrilgo lehiaketarako. Zuazok irabazi zuen lehiaketa, baina Mercadalek osatu zuen haren proiektua; aipatzekoak dira Mercadalek lorategietan eta plazetan egindako eraberritze-lanak. Bestalde, García Mercadalek GATEPAC (Grupos de Arquitectos y Técnicos para el Progreso de la Arquitectura Contemporánea) sortu zuen 1930ean, eta haren zuzendari izan zen 1932 arte.
Erreferentziak aldatu
- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/26 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.
Datuak: Q3751119
Multimedia: Fernando García Mercadal / Q3751119
