Baxoa

Baxoa (frantsesez Baccalauréat, hizkuntza kolokialean bac eta lehenago bachot^[1]) Frantzian Goi Mailako ikasketak egin ahal izateko ezinbestean eskuratu behar den titulua da.

Titulu bateratua da, Frantziako Errepublika osoan proba berberak egiten dira egun jakin batean, gero erkaketak-eta egin ahal izateko.^[2]

Ezaugarriak

Haren bertsio modernoan, Napoleon Bonapartek 1808ko martxoaren 17ko dekretu baten bidez sortu zuen; Europako azterketarik zaharrenetakoa da.

Lizeoetan prestatzen den batxilergoa amaitu ostean egiten da eta ikasketei balio ofiziala ematen dienez, unibertsitateetako ateak zabaltzen dizkie ikasleei, batzuek bestelako berezko probak ere eginarazten badizkie ere. Selektibitatean ez bezala, nota azterketa horren arabera kontatzen da eta ez da lizeoan lortutakoa kontuan hartzen. Lizeoko bigarren urtea amaitzen denean ikasgai batzuen azterketa egiten dute eta gainontzekoak, Terminala bukatutakoan. Gehienezko nota 20 da; 8 baino gutxiagorekin hurrengo urtean ikasleak azterketa errepikatu behar du, 8 eta 10 artean bigarren aukera du (idatziz aprobatutako bi gai ahoz eginez), hortik gora gainditu egiten da hiru, noten arabera: "Nahiko ondo" (12-13), "Ondo" (14-15), "Oso ondo" (16 edo gehiago). Azterketak ekainaren amaieran egiten dira.

Iparraldean, euskaraz irakasten duen Seaskaren Bernat Etxepare Lizeoko ikasleek ere azterketa hori frantsesez egin behar dute, bizpahiru gai bakarrik euskaraz egin ditzaketenean. Baxoa erabat euskaraz egiteko eskubidea errebindikatzen du "Baxoa Euskaraz!" elkarteak.^[3]

Motak

Hiru mota daude:

Orokorra: haren baitan Ekonomiko eta Soziala, Literarioa eta Zientifikoa daude.
Teknologikoa: Kudeaketaren Zientziak eta Teknologiak, Zientzia eta Teknologia Industrialak, Laborategiko Zientzia eta Teknologiak, Osasun eta Gizarte Zientzia eta Teknologiak, Bizitza eta Agronomiaren Zientzia eta Teknologiak, Musika eta Dantzaren Teknikak eta azkenik Ostalaritza daude.
Profesionala: 80 bat adar daude: Aeronautika, Modaren alorrekoak, Argazkilaritza, Idazkaritza...

Erreferentziak

↑ Bachot hitzetik dator euskaraz erabiltzen den hitza.
↑ «Etxepare Lizeoa, Baxoaren emaitzetan onena Frantziako lizeo guztien artean» Argia (Noiz kontsultatua: 2022-03-25).
↑ «Desobedientzia ekintza baxoan: berrogei ikaslek euskaraz erantzun dute filosofiako azterketa» Argia (Noiz kontsultatua: 2021-06-17).

Ikus, gainera

Brebeta.
Batxilergoa, hitz bera erabili arren Espainian Bigarren Hezkuntzako amaierako zikloa da. Frantzian, aldiz, Baxoa Goi Mailako ikasketak egiteko aprobatu behar den azterketa da.
Selektibitatea, espainiar estatuan, eta beraz Hego Euskal Herrian, baxoaren parekoa den azterketa.
Azterketak Euskaraz

Kanpo estekak

Hautaprobak: Baxoa eta Selektibitatea, Hik Hasi aldizkaria. 149. alea, 2010eko ekaina.
Selektibitatea eta Baxoa. Unibertsitaterako sarbide irizpideak ezbaian, Larrun, 154. zkia.

Datuak: Q798022
Multimedia: Baccalauréat / Q798022

[1] Bachot hitzetik dator euskaraz erabiltzen den hitza.

[2] «Etxepare Lizeoa, Baxoaren emaitzetan onena Frantziako lizeo guztien artean» Argia (Noiz kontsultatua: 2022-03-25).

[3] «Desobedientzia ekintza baxoan: berrogei ikaslek euskaraz erantzun dute filosofiako azterketa» Argia (Noiz kontsultatua: 2021-06-17).

[1]

[2]

[3]