Jožin z bažin
Jožin z bažin (1977) Ivan Mládek musikari eta umorista txekiarraren abesti ezagunenetako bat da. Are gehiago, bere "Counteryshow" telebista-saioan "Nazio Ereserki" deitu zion. 2008ko urtarrilean, abestia ezaguna egin zen Polonian, irratiko zenbait hitlist irabazita. Hungarian, Austrian eta Errusian ere ezaguna da, blogetan kultuzko jarraipena du eta hainbat itzulpen eta bertsio ezberdin ditu.
| Jožin z bažin | |
|---|---|
Banjo Band (en)  musika-lana | |
| Egilea(k) | Banjo Band (en) |
| Argitaratze-data | 1977 |
| Ezaugarriak | |
| Genero artistikoa | herri-musika, pop musika eta jazza |
| Hizkuntza | txekiera |
| Iraupena | 151 segundo |
| Diskoetxea | Panton Records (en) |
| Hitzak | Ivan Mládek (en) |
| Bideoa | YouTube |
Abestia zingiretan bizi den munstro gizajale misteriotsu baten ipuin surrealista da (Jožin z bažin 'zingiretako Joxepe' moduan itzul daiteke). Abestian, azkenean, fumigatzeko tresna edo lainoztagailu bat erabilita garaitzen dute munstroa.
Ipuina aldatu
Abestia Erdi Aroko ipuinen parodia da, non zaldun ausart batek munstro ikaragarri batek izuturik daukan urruneko erresuma bat salbatzen duen, eta sari gisa printzesarekin ezkontzea eta erreinuaren erdia jasotzen duen.
Abestian, Moravia eskualde txekiarrean zehar Škoda 100 bat gidatuz doan gizon batek Jožin izeneko munstro batek izuturik daukan herrixka bat aurkitzen du; munstroak batez ere Pragako turistak jaten ditu. Tokiko etxalde komunaleko (txekieraz: JZD) presidenteak JZDaren erdia eta bere alabaren eskua agintzen dizkio, baldin gizonak munstroa garaitzen badu. Gizonak fumigazio-hegazkin bat eskatzen du, munstroaren aurka egiteko ezagutzen den arma bakarra, Jožin harrapatu, eta zoo bati saltzea erabakitzen du.
Bertsioak aldatu
Kabaret pod Wyrwigroszem izeneko kabaret poloniar batek Donald Tusk Poloniako lehen ministroari buruzko Jožin z bažin kantuaren parodia sortu zuen, Donald marzy ('Donald ametsak') izenburupean. Мурзилки International talde errusiarrak errusiar parodia bat egin zuen Путин едет в Пикалёво ('Putin Pikalyovora doa') izenekoa, Vladimir Putin Errusiako lehen ministro ohiari eta egungo presidenteari buruz. Abestiaren bertsio serbiarra ere bada: Medo Brundo 'Brundo hartza'. Badira baita ere abestiaren hainbat parodia lituanieraz, nagusiki herrialdeko politikari zorigaiztokoenei eta Andrius Kubilius lehen ministro ohiari buruz. Ivan Mládeken Banjo Band-ek Jožin z bažin abestiaren bertsio poloniarra sortu zuen.
Metallica heavy metal talde estatubatuarrak abestiaren bertsio bat jo zuen 2018an, Pragan eskainitako kontzertu batean.[1][2]
Erreferentziak aldatu
- ↑ «Metallica zahrála v Praze Jožina z Bažin - Novinky.cz» www.novinky.cz (Noiz kontsultatua: 2021-02-25).
- ↑ «Metallica zahrála v Praze. Došlo i na Jožina z bažin a práškovací letadlo» iRozhlas.cz.
Kanpoko estekak aldatu
- Bideoa ingelesezko azpidatziekin YouTuben
- Jatorrizko bideoa kalitate altuagoan YouTuben
- Partiturak musescore.com webgunean
Datuak: Q2526112
