Ireki menu nagusia

T linfozitoak edo T zelulak linfozito mota bat dira (besteak B linfozitoak izanik), zelulen bidezko erantzun immunitarioaren arduradunak direnak. Immunitate-sistemaren funtsezko elementuak dira, immunitate zelularrean ez ezik, antigorputzen bidezko immunitatean ere zeregin oso garrantzitsua burutzen dutelako.

T linfozito guztiak hezur-muinean sortzen dira. Sortu ondoren heldugabeak dira, eta ezin dira B linfozitoetatik bereizi. Timora zuzentzen dira gero, eta hor heltzen dira [1]. Timoan dagoen heldugabeko linfozitoari timozito deritzo.

Heldu ondoren, hiru T linfozito mota sortzen dira:

  • T linfozito hiltzaileak (Tc edo CD8+ ere deituak): gauza dira birusek edo beste mikrobio batzuek -zelula barneko parasito direnak- infektatutako zelulak ezagutzeko eta suntsitzeko [2]. Zelula gaiztoak edo tumoralak ere suntsitzen dituzte CD8+ linfozitoek, eta transplantatutako organoen zelulen aurka ere jarduten dute (errefusaren arduradunak dira). Linfozito mota hauek zelula barneko parasitoen aurka eraginkorrak diren bakarrak dira.
  • T linfozito laguntzaileak (Th edo CD4+ ere deituak): B linfozitoen garapenean parte hartzen dute, hauek antigorputzak sor ditzaten. Horretaz gain, nahiz eta ahalmen litikorik ez izan (T linfozito hiltzaileak bezala), CD4+ linfozitoek immunitate-sistemaren beste zelula batzuk zuzentzen dituzte fagozitosia egin dezaten [3]
T linfozitoen aktibazio prozesua
  • T linfozito supresoreak (Ts deituak): erantzun immunea moteltzen dute, infekzioa kontrolpean dagoenean. Gehiegizko immunitatea eragozten dute.

Timoan heldu ondoren, T linfozito guztiak odolera eta linfara abiatzen dira, eta gongoil linfatikoetan pilatzen dira.

T linfozitoek erabateko heldutasuna lortzen dute antigeno batekin topo egiten dutenean. Orduan aktibatzen baitira. Aktibatzen diren lehenengo linfozitoak Th linfozitoak dira [4]. Mikrobio inbaditzaile bat gure organismoan sartzen denean makrofagoek edo zelula dendritikoek mikrobio hori irentsi eta gero bere antigenoak aurkezteen dizkiete Th linfozitoei. Th linfozitoek proteina berezi batzuk dituzte euren azaletan (ez dira antigorputzak). Th linfozito ugari daude organismoan, milioika, bakoitzak bere berezko proteinak ditu azalean. Immmunitate humoralaren legez, antigeno arrotzak berarekin gehien konplementatzen den Th linfozito mota bat hautatuko du, azaleko proteinak hobekien akoplatzen diren antigeno horrekin dituena.

Antigenoak aukeratutako Th linfozitoen klona aktibatu eta oso azkar ugalduko da. Ugaltzeaz gain, aktibatzen denean klon horrek zitokinak askatzen ditu.[5] Zitokinek funtsezko zeregina burutzen dute partikula arrotzak suntsitzeko: Tc linfozitoak, B linfozitoak eta makrofagoak aktibatzen dituzte horiek haien lan suntsitzailea burutu dezaten. T linfozito guztiek zitokinak ekoizten dituzte.

HIESaren birusa eta T linfozitoakAldatu

HIESaren birusak (GIBak) immunitate-sistema nabarmen ahultzen du, eta immunoeskasia larria eragiten du infektatutako gizabanakoetan. T linfozitoak (batez ere linfozito laguntzaileak, Th) suntsitzen ditu birus horrek, immunitate humoralean zein zelularrean funtsezko zeregina burutzen duten linfozitoak (gogoratu Th linfozitoak antigeno arrotzak identifikatzen eta erantzun immunea abiatzen lehenak direla).

HIESa fase oso garatuan duten gaixoek T linfozito CD4+ gutxi dituzte [6]

T linfozitoak eta minbiziaAldatu

Immunitate-sistemak funtsezko zeregina burutzen du minbiziaren prebentzioan, NK zelulen eta T linfozitoen bidez (zelula hauek minbizidun zelulak ezagutu eta suntsitzen baitituzte). Tumore baten zelulek zelula normaletan agertzen ez diren azaleko antigenoak dituzte. Immunitate-sistemak antigeno horiek arrotzatzat hartzen ditu eta antigeno horiek dituzten zelulei eraso egiten die. Erasotzeko erabiltzen dituen elementuak makrofagoak, NK zelulak eta T linfozitoak dira.[7]

NK zelulak, bereziki, oso aktiboak dira zelula gaiztoak suntsitzeko, T linfozito laguntzaileekin batera.[8][9] Batzuetan zelula gaiztoen aurkako antigorputzak ere sortzen dira, konplementu sistema aktibatzen dutenak lisia eragiteko.[10][11]

Immunozaintzaren teoriak dioenez zelula gaiztoak eta tumoreak sarri sortzen dira gorputzean, baina immunitate-sistemaren elementuek zelula horiek deusestatzen dituzte tumorea sortu aurretik. Teoria horren aldeko argudio nagusia da pertsona immunogutxituek (HIESa dutenek, botika immunosupresoreak hartzen dituztenek, adineko jendeak -T linfozito gutxiago dutenek[12]-...) minbizia errazago pairatzen dutela immunitate-sistema normala dutenek baino.[13]

Zahartu ahala, minbizia pairatzeko probabilitatea areagotu egiten da. Horren arrazoia honako hau izan liteke: timoa, T linfozitoak sortzeko ezinbestekoa den organoa, urteak bete ahala endekatu egiten da: umeengan lortzen du organo horrek bere tamainarik handiena, baina gero atrofiatzen da eta zahartzaroan oso txikia da. Horrenbestez, aro horretan T linfozitoen kopurua asko murrizten da eta immunozaintzaren eraginkortasuna (hots, tumoreak detektatzeko eta suntsitzeko ahalmena immunitate-sistemaren bidez) nabarmen jaisten da [14]

ErreferentziakAldatu

  1. Aldaba, J., López P., Pascual, MM., Urzelai, A: Biología 2. Batxilergoa, Elkar (2006), 365-366 orr. ISBN: 84-783-222-1
  2. Sistema inmunologikoaren osagaiak: zelulak eta organoak Euskadi.eus
  3. McHeyzer-Williams L, Malherbe L, McHeyzer-Williams M (2006) Helper T cell-regulated B cell immunity. Curr Top Microbiol Immunol 311: 59-83
  4. Ingraham, J. eta Ingraham, C.: Introducción a la Microbiología vol. II, Ed. Reverté (1998), 415-416 orr. ISBN: 84-291-1871-3
  5. Alberts, Bruce; Alexander Johnson, Julian Lewis, Martin Raff, Keith Roberts, and Peter Walters (2002) Molecular Biology of the Cell, 4th edition New York and London: Garland Science ISBN: 0-8153-218-1
  6. MedLine Plus
  7. Gorka Larrinaga, Iker Badiola eta José Ignacio López Tumorearen mikroingurunean ezkutaketan jolasten Zientzia Kaiera(2018)
  8. Castelli C, Rivoltini L, Andreola G, Carrabba M, Renkvist N, Parmiani G (2000). «T cell recognition of melanoma-associated antigens». J Cell Physiol 182: 323-31
  9. Romero P, Cerottini JC, Speiser DE (2006). «The human T cell response to melanoma antigens». Adv Immunol. 92: 187-224
  10. Guevara-Patino JA, Turk MJ, Wolchok JD, Houghton AN (2003). «Immunity to cancer through immune recognition of altered self: studies with melanoma». Adv Cancer Res. 90: 157-77
  11. Renkvist N, Castelli C, Robbins PF, Parmiani G (2001). «A listing of human tumor antigens recognized by T cells». Cancer Immunol Immunother 50: 3-15
  12. Saavedra D., García B Inmunosenescencia: efectos de la edad sobre el sistema inmune Revista Cubana de Hematología, Inmunología y Hemoterapia (2014)
  13. Ingraham, J. eta Ingraham, C.: Introducción a la Microbiología vol. II, Ed. Reverté (1998), 443 orr. ISBN: 84-291-1871-3
  14. Saavedra D., García B. Inmunosenescencia: efectos de la edad sobre el sistema inmune Revista Cubana de Hematología, Inmunología y Hemoterapia