Kaliningradeko oblasta
Kaliningradeko oblasta (errusieraz: Калининградская область; alemanez: Gebiet Kaliningrad edo Nordostpreussen, Ipar-ekialdeko Prusia) Errusiako subjektu federal bat da, Ipar-mendebaldeko Barruti Federalean dagoena. 15.100 km²ko eremua du eta 2010ean 941.873 biztanle zituen[1]. Zentro administratiboa Kaliningrad (lehenago, Königsberg) hiria da.
Anbararen eskualdea esan ohi zaio subjektu federal horri. Baltikoko kostaldean dago eta Errusiatik bakartuta geografikoki; hori dela eta, barrendegitzat hartzen da. Lituania eta Poloniarekin muga egiten du, eta herrialde horiek biak Europar Batasuneko eta NATO erakundeko kideak dira. Kaliningrad antzinako Prusiako hiririk handiena eta Ekialdeko Prusiako hiriburua izan zen.