Amaigabeko istorioa

Michael Ende idazlearen alemanierazko liburu batzuk.

Amaigabeko istorioa edo Istorio amaigabea fantasiazko eta abenturazko eleberri bat da, 1979an Michael Ende izeneko alemaniar idazleak 1979an idatzitakoa.

Euskaraz, bi bertsio desberdin izan ditu, izenburu desberdinarekin, gainera: lehena, Amaigabeko istorioa izenburuarekin, 1990ean argitaratu zen, Amaia Ugidosek itzulia eta Alfaguara-Desclée de Brouwer argitaletxearen eskutik. Bigarrena, berriz, 2019an atera zen, Istorio amaigabea izenburuarekin, Idoia Gilleneak itzulita eta Santillana-Zubia argitaletxeak plazaratuta.

Liburuak zer kontatzen du?

Pertsonaia nagusia Bastian Balthasar Bux izeneko mutikoa da, 11 urtekoa. Lagun gutxi ditu, eskolan gaizki pasatzen du eta gaizki moldatzen da ikasgai guztietan. Ama hil egin zaio eta aita jota geratzen da eta ia ez da arduratzen bere semeaz. Errealitatetik ihes egiteko, Bastianek fantasiaren munduarekin egiten du amets, liburuen bidez eta bere istorioak asmatuz.

Bastianek Amaigabeko istorioa izeneko liburu bat lapurtuko du antigoaleko gauzen denda batean. Egun horretan, klasera joan beharrean, eskolako teilatupera igotzen da liburua irakurtzeko. Liburuan kontatzen da fantasiaren lurraldea arriskuan dagoela: erregina, Haur Enperatriza, gaixotu egin da eta erresuma ere berarekin batera hiltzeko zorian dago. Erregina zenbat eta gehiago gaixotu, erresumako gero eta alde gehiago desagertzen dira eta "ezer ez" bitxia besterik ez da geratzen.

Neskatila enperatrizak Atreiu izeneko mutiko bat bilatzea agintzen du, eta bere gaixotasuna sendatzeko ardura ematen dio. Atreiuk haur enperatrizaren ikur magikoa jasotzen du, Auryn izena duena eta bera babestu eta gidatzen duena. Bastian berarekin dago beti, Atrejuren abenturei buruz irakurtzen ari delako. Ezer eza Fantasia osoa irenstear dagoenean, Bastianek irakurketaren bidez jakiten du bera dela Haur Enperatriza eta, beraz, Fantasiako erreinua salba ditzakeen bakarra. Onartu egiten du, baina zalantza handiz, arraroa iruditzen baitzaio liburu batean norbaitek bere laguntza behar izatea. Orduan, Haur Enperatrizak beste zerbait erabakitzen du: Mendi Errariko zaharra bilatzea, Amaigabeko istorioa idazten ari dena. Bisita honek liburua amaigabeko zirkulu batean sartzen dela esan nahi duenez, Bastian eskatzen zaiona egitera behartuta sentitzen da: Haur Enperatrizari izen berri bat eman; izena oihukatzen duenean, Bastian bera Fantasiako erreinura sartuko da.

Han, Haur Enperatrizak bere irudimenarekin Fantasia berreraikitzeko eskatzen dio. Bastianek Auryn ikur magikoa erabiliz bere desio guztiak lortzen ditu; izan ere, ikurraren alde batean, "Egin ezazu nahi duzuna" esaldia dago. Baina Bastianek ez daki desira bakoitzaren truke zerbait ahazten duela bere munduaz. Azkenean, ez du gogoratzen itzultzeko leku bat duenik ere, eta, azkenean, bere botere-egarriaren esklabo bihurtzen da. Bastian laster konturatzen da ikurreko esaldiak esanahi sakonagoa duela: desira guztiek ondorioak dituztela eta, beraz, zure borondaterik egiazkoena bilatu behar duzula. Bere lagun Atreiuri kolpe bat ematen dionean konturatzen da lagunak direla bere mundura eta bere aitarengana itzultzeko behar dituenak, hain zuzen. Desira batetik bestera, azkenik Bizitzaren Uretara iritsiko da, eta han desira guztien artean garrantzitsuena aseko du: maitatu ahal izatea.

Filmak

Wolfgang Petersen izeneko zuzendariak film bat egin zuen 1984an ingelesez liburu honetan oinarrituta. Arrakasta handia izan zuen; baina desberdintasun handiak zituen liburuarekin, eta Michael Endek salaketa jarri zuen liburuaren izena erabiltzeagatik film horretarako.

Geroago, bigarren eta hirugarren jarraipenak egin ziren 1990 eta 1994an, baina zerikusi gutxi zuten jatorrizko istorioarekin eta porrot egin zuten.

Bestalde, haurrentzako marrazki bizidunak eta Stories from the Infinite Story izenburuko telesail bat ere egin dira liburu honetan oinarrituta.