Trinity College (Dublin)

Trinity College, Dublin (TCD; irlanderaz Colaíste na Tríonóide) edo era formalean College of the Holy and Unidivided Trinity of Queen Elizabeth near Dublin (euskaraz Dublindik hurbil den Elisabet Erreginaren Trinitate Santu eta Banaezinaren Unibertsitatea), 1592an Elisabet I.ak sortu zuen eta Dublingo Unibertsitatea osatzen duen ikastetxe bakarra da, Irlandako unibertsitate zaharrena da. Trinity unibertsitatea College Green kalean dago, Irlandako Legebiltzar Etxeekin aurrez-aurre (gaur egun Bank of Ireland banketxearen egoitzak dira). Campusak 190.000 m²-ko azalera du), bertan hainbat eraikin erakargarri daudelarik, bai zahar nahiz berriak, patio handien eta bi joko zelaien inguruan kokatuta daudelarik.

Unibertsitate honen liburutegian Kellseko liburu ospetsua gordetzen da, bertan bisitarientzat ikusgai dagoelarik.

Historia

Dublingo lehenengo unibertsitatea Aita Santuak sortu zuen 1311ean eta Erreforma Protestanterarte iraun zuen. San Patrizio katedralean biltzen ziren dublindar batzuk lortu zuten 1592an Elisabet I.aren aldetik All Hallows monasterioan Dublingo Unibertsitate berria eratzeko baimena.

XVIII mendea lasaia izan zen Irlandan eta Trinity Collegek garatzeko aukera izan zuen, nahiz eta Protestanteen unibertsia baino ez zen. Parlamentua oso gertu zegoen eta dirulaguntza handiak eman zizkion. Lehenengo eraikina 1712an hasi zuten, Liburutegi zaharra, eta honi inprentak eta jangelak jarraitu zioten. 1793an katolikoek sartzeko aukera lortu bazuten ere 1972 arte ia erabat protestantea izaten jarraitu zuen Trinity Collegek.

XIX mendean Collegeak (fakultateak) sortu ziren, lehenengoa Legegintza, eta ondoren Medikuntza eta Ingeniaritza, besteak beste. XX mendea hastearekin batera (1904ean) emakumeak onartu ziren Trinity Collegen.

Eraikinak

• Trinity Collegeko Liburutegi Zaharra (Old Library): Eraikinik zaharrena da, 1732koa hain zuzen ere. 200.000 liburu zahar, marmolezko bustoak eta Irlandako arparik zaharrena dauzka. gela luze ikusgarriak 64 metrotako luzera du.
• Kanpaidorrea (Campanile): 30 metrotako kanpai dorrea da. 1853an eraiki zuen Sir Charles Lanyon arkitektuak.
• Altxorra (Treasury): Bertan dago Kellseko liburu ospetsua.
• Azterketa Gela (Examination Hall): 1791ean Sir Williams Chambersek diseinaturiko gela.
• Enparantzak: Parliament Square, Fellow's Square eta New Square.

Ikasle ezagunak

• Jonathan Swift
• Bram Stoker
• Oscar Wilde
• Samuel Beckett (Literaturako Nobel Sariduna)
• Ernest Thomas Sinton Walton (Fisikako Nobel Sariduna)
• Mairead Corrigan (Bakearen Nobel Sariduna)

Ikus gainera

• Dublingo Unibertsitatea
• Trinity Collegeko Liburutegia

Iruditegia

• 
  Parliament Square
• 
  Liburutegi zaharra
• 
  Kanpandorrea
• 
  George Salmon matematikariaren estatua
• 
  Liburutegi zaharreko areto nagusia. Gela luzea esaten diote.

Kanpo estekak

• Datuak: Q258464
• Multimedia: Trinity College Dublin / Q258464