Ireki menu nagusia

Hirurehun eta Hogeita Hamabost Urteko Gerra XVII. mendean hasi eta 1986an amaitu zen gerra izan zen, Scilly uharteak eta Zazpi Herbehere Batuen Errepublikaren artean. Odolik gabeko gerra bat izan zen. Gainera, ofizialki, historiako gerrarik luzeena da.

Hirurehun eta Hogeita Hamabost Urteko Gerra
335 years war locations.png
██ Scilly uharteak ██ Zazpi Herbehere Batuen Errepublika
Data 1651eko martxoaren 30a - 1986ko apirilaren 17a
Lekua Scilly uharteak
Gudulariak
Scilly uharteak Zazpi Herbehere Batuen Errepublika
Buruzagiak
John Granville Maarten Harpertszoon Tromp
Galerak
Inor ez Inor ez

GertaerakAldatu

1651. urtean, Ingalaterrako bigarren gerra zibila amaitzear zela, alderdi parlamentarioak ia lurralde osoa hartua zuen eta Kornubia mendebaldeko Scilly uharteak erregezaleen azken gotorleku bilakatu zen[1].

Herbehereetako Probintzia Batuek independentzia lortu zuten, espainiarren aurka Laurogei Urteko Gerran (1568-1648) borrokatu ondoren. Ingelesak holandarren aliatuak izan ziren gerra horretan, eta, horregatik, Herbehereek Ingalaterrako gerra zibilean Oliver Cromwell buru zuten parlamentarioen alde egitea erabaki zuten[1].

Baina erabakia hartzerako Scilly uharteak ziren alderdi erregezaleen esku zegoen lurralde bakarra, eta ez zuen zentzurik gerra herrialde osoari deklaratzea. Hortaz, uharteei soilik deklaratu zieten gerra, eta Herbehereetako ontzidia Scilly aldera abiatu zen, urte batzuk lehenago jasotako laguntza itzultzeko prest[1].

Baina deklarazioa eta berehala, 1651ko ekainean, Robert Blake almirantea buru zuen flota parlamentarioak erregezaleak errenditzera behartu zituen. Oliver Cromwellek, berehala, Tresco uhartean gotorleku bat eraikitzea erabaki zuen, monarkia parlamentarioaren aldekoen nagusitasunaren seinale. Herbehereetako ontzidia, iritsi bezala erretiratu zen, tiro bakar bat bota gabe. Baina gerra deklarazioa bertan behera uztea ahaztu zitzaien[1].

1985ean, Roy Duncan historialaria Scilly Uharteetako Kontseiluko presidentea zen. Holandarren gerra deklarazioaren “mitoaren” berri zuen, baina ez zekien benetan deklarazio ofizialik izan zen, ala mendetan zehar ahoz aho elikatutako legenda hutsa. Berak ordezkatzen zituen uharteak oraindik gerran ote zeuden argitzeko, Herbehereen Londresko enbaxadara gutun bat bidali zuen[1].

Enbaxada gaiari buruzko dokumentazioa aztertzeaz arduratu zen, eta deklarazioa benetakoa zela eta oraindik indarrean zegoela erantzun zioten historialariari. Duncanek uharteak bisitatzeko gonbitea luzatu zion Rein Huydecoper enbaxadoreari, eta, hala, 1986ko apirilaren 17an, gerra ofizialki “hasi” eta 335 urtera, bake ituna sinatu zuten[1].

ErreferentziakAldatu

  1. a b c d e f Nagore Irazustabarrena, «Historiako gerrarik luze eta baketsuena», Argia, 2012-05-27, CC-BY-SA lizentzia