Hedabideen plangintza

Hedabideen plangintza publizitate-diziplina da, zeina arduratzen den publizitate-mezuak publiko edo xede taldeko ahalik eta pertsona gehienei helarazteaz. Plangintzaren helburua da hedabideen konbinaziorik onena zehaztea, bezeroen helburuak lortzeko. Horretarako, kasu bakoitzerako hedabide eta euskarri egokienak hautatu behar dira, ahalik eta kosturik txikienean lortzeko.

Planifikazio-prozesuan, hedabideen planifikatzaileak honelako galderei erantzun behar die:

• Entzuleetako zenbati irits dakioke hedabideen bidez? (Zein da estaldura?)
• Zein komunikabidetan (eta euskarritan) jarri behar dira iragarkiak?
• Zein maiztasunekin jarri behar dira iragarkiak?
• Zenbat diru gastatu beharko litzateke hedabide bakoitzean?

Hainbat estrategia eta taktika abian jartzea da hedabideen plangintza, publizitate-mezu bat aurrekontu mugatua duten hedabideen bitartez zabaltzeko. Estrategia horiek zenbait arlotako ezagutza eskatzen dute, besteak beste: bezeroa edo iragarlea, haren produktuak, prezioak, marketin- eta salmenta-estrategiak eta lehiakideak erabat ezagutzea. Merkatuan nagusitasuna lortzea da helburua, hedabideetan lehiakideei aurrea hartzen saiatzea, kontsumitzaileak iragarlearen produktua edo zerbitzua besteen gainetik hautatzekotan.

Hedabideen plangitza garatzen

Hedabideen plana burutzeko honako faseak jarraitu behar dira:

Aurrekarien azterketa

Briefing-aren azterketa (produktua, merkatua, kontsumitzailea, lehia, banaketa, marketin-helburuak, etab.); lehiaren publizitate-jarduera aztertzea (erabilitako hedabideak eta egindako kanpainak); komunikazio-estrategia orokorraren azterketa. Fase horri Informazio-fasea deritzo.  

Helburuen zehaztapena

Kanpainaren helburu orokorrak eta publizitate-kanpainarako helburu konkretuak mugatu. Fase honetan aintzat hartu behar da eremu geografikoaren zehazpena.

Hedabideen hautaketa

Audientziak ikertzen dituzten zenbait informazio iturritan oinarrituz (adb: EGM, CIES, KANTAR…) kanpaina hedatuko deneko hedabideak aukeratzea:

• Ohiko bideak: hedabide digitala, telebista, irratia, egunkariak, kanpo publizitate bideak, aldizkariak, zinema eta igandekariak.

• Ezohiko bideak: telefono bidezko marketina; mailing pertsonalizatua; publizitatea saltokian, merchandising-a, seinaleztapen eta errotuluak; Branded Content; kirol-babeseko ekintzak; babesgoa, mezenasgoa, gizarte-gestioa eta gizarte-erantzukizun soziala; postontzietako publizitatea eta liburuxkak; Influencerrak; urtekariak, gidak, direktorioak eta katalogoak; animazioak; off line publizitate-opariak, fidelizazio-txartelak eta sustapen jokoak; azokak eta erakusketak; enpresen argitalpenak: aldizkariak, buletinak, memoriak .

Ekintzen denboraldiak gomendatzea

Fase honetan erabaki behar da noiz egingo diren kanpainaren ekintzak, epeak eta horien iraupena, jarraikortasuna edo atsedenak. Fase honetan oroimen ikerketak hartu behar dira kontuan mezuaren maiztasuna erabakitzeko.

Euskarrien aukeraketa eta gomendioa

Behin hedabide orokorrak aukeratuta, jarraian euskarri jakinak aukeratu beharko dira eta bertan ordutegi eta programak zehaztu iragarkiak txertatzeako, baita iragarki edo piezen formatuak zehaztu ere.

Txertaketen egutegia eta aurrekontua

Fase honetan jardueren antolaketa egin behar da, bai aurrekontua aintzat hartuz, bai ekintzen arteko antolakuntza eta hierarkia taula edo egutegi batean islatuz.

Espero diren emaitzen laburpena

Amaitzeko, aurrebaluazioa eta aurretestak egin behar dira kanpaina martxan jarri baino lehen, emaitza posibleak aurreikusteko. Geroago, kanpaina martxan jarri eta gero, jarraipena egin behar da planifikatutako ekintzak betetzen ari direla ziurtatzeko.

Kanpo estekak

• Datuak: Q1250104