Avogadroren konstantea

Avogadroren konstantea (sinboloa: N_A edo L) lagin baten gauzaki elementalen kopurua eta substantzia-kantitatearen arteko proportzionaltasun faktorea da. Bere definizio zehatza da:

N_A = 6,02214076×10^²³ mol⁻¹

Nazioarteko Sistemaren unitatea alderantzizko mola (mol⁻¹) da. Konstantearen zenbakizko balioari Avogadroren zenbakia deritzo.

Avogadroren zenbakia = 6,02214076×10^²³

Amedeo Avogadro zientzialari italiarraren ohorez deitzen da horrela, bere balioa kalkulatu ez zuen arren. Balio hau asmatu zen kalkulu kimikoak errazteko, mol baten masak gramotan eta gauzaki elemental baten masak masa atomikoaren unitateetan (u) balio bera izan zezan. Adibidez uran, molekula baten batezbesteko masa 18,015 u bada, mol baten (6,02214076×10^²³ molekularen) masa 18,015 g izango da:

Ura (5 zifra esanguratsura biribildua)

Substantzia-kantitatea		Masa
mol	molekulak	u	g
1,6605×10^−24	1,0000	18,015	2,9915×10^−23
1,0000	6,0221×10^23	1,0849×10^25	18,015

Balio zehatz bezala birdefinitu zen arte 2019an, Avogadroren konstantea karbono-12aren 12 g-tan dagoen neurtutako atomo kopurua zen: 6,02214199(47)×10^²³ mol⁻¹. Neurketa zenez ziurgabetasun bat zuen, parentesi artean adierazita, baina oraingo definizio zehatzak ez du ziurgabetasunik. Hau da, dozena bat zerbaiten zehazki 12 unitate diren bezala, mol bat zerbaiten zehazki 6,02214076×10^²³ unitate dira.

Ikus, gainera

• Avogadroren legea

Kanpo estekak

• Datuak: Q6203
• Multimedia: Avogadro's number