Puntu (puntuazioa)

Artikulu hau idazkerari buruzkoa da; beste esanahietarako, ikus «Puntu (argipen)».

Puntua ( . ) perpaus baten amaiera adierazteko erabiltzen den puntuazio zeinua da.

Puntuaren ostean lerro-jauzia edo paragrafo aldaketa baldin badator, puntu eta aparte deitzen zaio, eta kontrako kasuan, lerro-jauzirik ez badago, puntu eta jarrai deitzen zaio. Perpausaren bukaera izanagatik, izenburu, atalburu, goiburu eta abarrak bukaerako punturik gabe idaztea da ohitura.

Honez gain, puntuak baditu beste zenbait erabilpen:

• Laburdurak adierazteko. Adibidez: etab. eta abar adierazteko.
• Inizialak adierazteko puntua erabiltzen da. Ez, ordea, siglak eta akronimoak adierazteko. Adibidez: A. Etxeberriak EIZIEn egiten du lan.
• Euskaraz, ordinala adierazteko ere erabiltzen da: Gaurko lasterketan 5. (edo bosgarren) gelditu naiz. Enrike III.a Nafarroakoa. Data bateko urtea adierazteko, punturik gabe hobesten da, zenbakiaren ondoren urtea hitza datorrenean salbu. Adibidez: 2017ko urrian hasi nintzen lanean, eta orain 2019. urtean gara. (Interpretazioa bera da mendea, eguna eta abarrekin)
• Anglosaxoniarrek ez beste guztiek, tradizionalki puntua erabili dute milatik gorako zenbakietan zifrak hirunaka banatzeko: 2.372.182. Edonola ere, gaur egun deus ez erabiltzea edo zuriune batez markatzea da zabaltzen ari den ohitura, ISO arauei jarraiki. Euskaltzaindiak ere hori aholkatzen du testu zientifikoetan.
• Anglosaxoniarrek zenbaki osoak eta dezimalak banatzeko erabiltzen dituzte: 3.141592

Kanpo estekak

• Datuak: Q172008
• Multimedia: Period (punctuation) / Q172008