Elektrobalbula
Elektroiman edo solenoide batez eragindako balbula. Solenoidea korronte elektrikoz elikatzen denean, itxi egiten du balbula (baldin eta irekita bazegoen) edo ireki egiten du (baldin eta itxita bazegoen).
Elektrobalbula hodi edo bestelako eroanbide batean barrena doan fluido baten emaria kontrolatzeko balbula elektromekanikoa da. Korronte elektrikoak kontrolatzen du balbula elektroiman edo solenoide baten bidez. Bi ateko balbula bada, fluidoa pasatu edo ez pasatu egoeren artean kommutatzen du balbulak; hiru atekoa bada, fluidoa bi zirkuituren artean kommutatzen du.
Industrian asko erabiltzen dira era guztietako likido eta gasen iragatea kontrolatzeko. Etxetresna elektriko batzuetan ere erabiltzen da; adibidez, plater-garbigailuetan eta ikuzgailuetan.
Elektrobalbulak eta balbula motordunak gailu desberdinak dira, eta ez dira nahastu behar; balbula motordunetan, motor batek eragiten dio balbulari.
Erreferentziak
aldatu- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.