Euskara: Irudi honetan balio handia kolorea erdian bakarrik agertzen denean ulertzen da, zientziarako konpetentziaren angeluan bezala, eta koloreak kanpoko zirkuluetan agertzen direnean, konpetentzia horiek gutxi landu direla ulertu behar da. Edo, teknologiarako konpetentzian bezala, ezer ere ez.

Edozein unitate didaktikori ekin baino lehenago, irakasgai jakin bateko irakasleek horrela banatu zituzten lantzen ziren oinarrizko arloetako konpetentziak. Angelu zabalagoak eta estuagoak ezarri zituzten konpetentzia bakoitzari ematen zitzaion denbora eta espazioaren arabera.

Unitate didaktiko batean zuhaitzei buruz ikasteko parkera joan dira ikasleak fitxa batzuk, ataza batzuk, betetzera.

Irakasleak argazki kamerak, tabletak eta telefonoak erabiltzea onartzen zuen.

Seek by iNaturalist aplikazioa gomendatu die, edo, besterik ezean, telefonoan Wikipedian begiratzeko. Ikasleek ez dituzte aukera horiek batere aprobetxatu.

Paperezko fitxetan zegoena betetzearekin joan zaie denbora osoa eta ez dute beste informazio iturririk erabili.

Ikasleak aldez aurretik espero zitekeena baino askoz gehiago ibili dira aurrera eta atzera parkean eta irakasleen ustez motrizitaterako konpetentzia oso ondo landu egin da. Kilometroak egin dituzte oinez ikasleek eta.

Ikasle talde bakar batek marraztu ditu zuhaitzen orriak. Bi ikaslek, biak talde berekoak. Eta oso argazki gutxi eta txarrak egin dituzte.

Ez dute batere erabili logika matematikoa lana errazago, arinago, hobeto egiteko, eta eskatutako lanak aukerak ematen zituen. Pentsatu beharrean, burua erabili beharrean, hankak erabili dituzte.

Irakasleak ikasleak laukoteka antolatu baditu ere, ikasle batzuk lagunekin ibili dira eta beste batzuk bakarka. Laukoteak ez dira elkartu ia-ia inoiz ere ez.

Ikasleak hortxe ibili dira landareei begira-begira, eta zomorroei, eta gero galdera interesgarriak egin dizkiote irakasleari, horregatik zientzia konpetentzia ebaluatzerakoan irakaslea baikor agertu da.

Hizkuntza- eta literatura- komunikaziorako konpetentzia dexente landu dela ebaluatu dute irakasleek. Izan ere, ikasleek beren lehen hizkuntza erabili dute euren artean eta beren bigarren hizkuntza irakasleekin. Eta nahiko ongi idatzi dute fitxetan.