Euskara: Hormigoia, eraikitzeko armatua

Hormigoia iraultzailea izan da arkitekturarako materialen artean. Hasieran, batez ere, harria eta egurra erabiltzen ziren, eta adibidez katedral gotiko erraldoiak egin zituzten. Gero burdina, altzairua eta kristala erabili ziren, eta eraikin are handiagoak egin zituzten, eta gero hormigoia iritsi zen, eta tamainaz gain, eraikinen forma berriak ere ekarri zituen. Gaur egun oinarrizko eraikuntza materiala da.

Transkribapena:

Erdi Aroaren bukaeran, Parisera iristen ziren bidaiarientzat Notre Dame katedrala ikusgarria izango zen. Eraikin erraldoi bat zen, etxe txiki askoren artean. Ia-ia, eraikin batek izan zezakeen tamainarik handiena zuen, harriz, egurrez eta beiraz egindako egitura bat nekez izan zitekeelako handiagoa.

Mende batzuk geroago, ingeniariek burdinazko pieza handiak egiten ikasi zuten, eta eraikuntzaren mundua hankaz gora jarri zuten. Hasieran, burdinurtua erabili zuten, eta gero burdina forjatua. Eta katedralak txikiak utzi zituzten. Azkenean, burdinaren manipulazioak altzairua sortu zuen, eta katedralak txiki utzitako eraikinak ere gainditu zituzten.

Baina begiratu ingurura. Zure ustez, zein da gaur egungo eraikuntzako material nagusia? Zaila da bakarra aukeratzea. Baina hautagai argienetako bat hormigoi armatua da.  

Hormigoia materialen koktel bat da. Harria eta buztina labetik pasatu, birrindu eta igeltsuarekin nahastuta, zementua lortzen da. Horri ura, legarra eta propietate bereziak emango dizkioten substantziak gehitu, eta hormigoiaren koktela osatuta dago. Hormigoi armatua hormigoia da funtsean, baina hezurdura gogor batekin, altzairuzkoa normalean.

Kanpotik ez da oso deigarria. Material gris bat, besterik ez. Seguru asko, zure herriko etxebizitza-blokeak hormigoi armatuz eginda daude. Forma emanda eta, zergatik ez, beste material batez estalita, asko aldatzen da itxura. Sydneyko opera edo New Yorkeko Guggenheim museoa hormigoi armatuzkoak dira. Eta ez lukete itxura bera izango, harriz eta egurrez eginez gero.