Basagereziondo

Loreak

Basagereziondoa (edo basagerezia), edo batzuetan gereziondoa soilik (edo gerezia), (Prunus avium) Cerasus motako zuhaitza da.

Prunus terminoa basaranaren izena da; Avium terminoak, berriz, txoriena adierazten du: txoriek gogoz jaten dituzte gereziondoen fruituak.

Ezaugarriak

Hosto erorkorreko zuhaitza da, eta 30 m garai izan daiteke.

Zurtoina – Azala

Enbor lodia du, eta azala, arre-gorrixka eta distiratsua, zerrenda horizontaletan askatzen da. Gaztaina-kolorekoa edo gorrixka da egurra, eta gogorra eta astuna.

Hostoak

Obalak eta horzdunak dira hostoak; bi guruin gorri dituzte txortenarekin lotzeko puntuan.

Loreak

Hostoak baino lehen hazten dira loreak, martxoaren amaieran edo apirilean; zuriak dira, eta multzo txikitan -ginbeletan- agertzen dira.

Fruituak

Drupa gorri jangarria da fruitua: gerezia. Maiatzetik uztailera heltzen da.

Banaketa

Eurosiberiarra. Euskal Herrian lurraldearen iparraldearen erdia du gogokoen, nahiz eta herrialdearen erdialdeko baso freskoetan eta ibai ertzeetan ere ageri da.

Ugalketa

Gereziondoa martxoa eta apirila bitartean loratzen da. Fruituak ekaina, uztaila eta abuztuan ematen ditu. Ereiteko hilabete egokienak ekaina, uztaila eta abuztua dira, eta abendua, urtarrila eta otsaila dira landatzeko hilabete onenak.

Haziaren hezurretik oso ongi ernetzen da, bestela, zaila da ugaltzea.

Erabilerak

Landatuta haren fruitu jangarriak baliatzen ditugu. Zurgintzan ere balio handia du.

Bitxikeriak

-Gereziondo-lorearen petaloak gailetak, pastelak eta jaleak egiteko erabil daitezke. -Samuraiek uste zuten gereziondoaren loreak odola sinbolizatzen zuela, eta, aldi berean, baita bizitza zein hauskorra eta iragankorra den ere.