Neil Armstrong (1930eko abuztuaren 5a – 2012ko abuztuaren 25a) Ameriketako Estatu Batuetako astronauta bat izan zen, eta Ilargia zapaldu zuen lehen gizakia.

Esaldi ezagun hauxe esan zuen Lurrera itzultzean: «Oso pauso txikia da gizaki batentzat, baina oso pauso handia gizadiarentzat». Ohion jaio zen 1930eko abuztuaren 5ean. Txikitatik hegazkin-pilotu izan nahi zuen, eta 16 urte bete zituenean lortu zuen pilotu lizentzia; geroago ingeniaritza aeronautikoa ikasi zuen eta Koreako Gerran parte hartu zuen.

Armstrong NASAren espazio-programara batu zen 1962an. Urte batzuetako entrenamenduaren ondoren, 1969an, Buzz Aldrin eta Michael Collinsekin batera Apollo 11ren misioan parte hartu zuen Ilargira iristeko. Uztailaren 20an, Eagle ilargi-modulua, Armstrong eta Aldrin ontzian zeudela, aginte-modulutik banandu zen, eta, Armstrongek eskuz gidatuta, Ilargian pausatu zen. Gure satelitean eman zituzten 21 ordu baino gehiagotan, astronautek bi ordu inguru eman zituzten gainazalean oinez, zoruaren eta arroken laginak biltzen, argazkiak ateratzen eta tresna zientifikoak zabaltzen, milioika pertsonak telebista bidez ikusten zuten bitartean. Lurrerako itzultzeko bidaia uztailaren 21ean hasi zen, eta hiru egun geroago iritsi ziren.

Armstrongek 1971n utzi zuen NASA. Ordutik 1979 arte ingeniaritza aeroespazialeko irakaslea izan zen Estatu Batuetako Cincinnati Unibertsitatean. 1979tik aurrera, Armstrong hainbat enpresatako presidente edo zuzendari izan zen. 2012ko abuztuaren 25ean hil zen.


Ilargirako bidaian joandako hiru astronautak. Ezkerretik eskuinera: Neil Armstrong, Michael Collins eta Buzz Aldrin.