Midas

Midas erregearen zigorra.

Midas, antzinako greziar eta erromatar mitologien arabera, ukitzen zuen guztia urre bihurtzeko boterea zeukan errege bat izan zen. Midas errege hori bere eromenagatik eta diruzalekeriagatik da ezaguna. Haren inguruko istorioek argi erakusten dute zerbait egin edota esan baino lehen bitan pentsatu beharra.

Istorio horietako batean, Sileno deituriko norbait noraezean omen zebilen eta Midasen lorategietan hartu zuen lo. Atsegina izan zen Midas Silenorekin eta etxera heltzen lagundu zion. Sileno hura Dioniso jainkoaren laguna zen. Dionisok Midasi desio bat eskaini zion haren laguntza eskertzeko. Midasek, batere pentsatu gabe, ukitzen zuen guztia urre bihurtu ahal izatea eskatu zion, eta Dionisok agindutakoa bete zuen.

Midas, bere botereaz baliatuta, eroruta bezala hasi zen gauza guztiak urre bihurtzen, urre-gosez; baina laster ohartu zen bere hutsegiteaz: jaten saiatzen zen aldiro, janaria ere urre bihurtzen zitzaion, eta urrea ezin da jan. Berehala konturatu zen gosez izango zela laster. Midasek Dionisori gaitasun berri hori ezabatzeko eskatu zion, eta hala egin zuen.

Beste kontakizun batean, Midasek Pan jainko txikiaren eta Apolo jainko boteretsuaren arteko musika-lehiaketa bat epaitu zuen. Midasek Pani eman zion saria eta Apolok, mendekuz, Midasen belarriak asto belarri bihurtu zituen.