Babelgo dorrea (Bibliako istorioa)

Babelgo Dorrea Biblian agertzen den istorio bat da, Genesia edo Hasiera deitzen den liburuan dagoena. Istorio horren arabera, oso aspaldi, Uholde Handiaren ondoren, gizaki guztiak leku berean bizi ziren eta hizkuntza bera hitz egiten zuten. Hiri bat eta dorre bat eraikitzea erabaki zuten, zeruraino iritsiko zena. Hau egin nahi zuten ospetsu bihurtzeko eta denak leku berean elkarrekin bizitzen jarraitzeko.

Baina Jainkoak ikusi zuen zertan ari ziren, eta ez zitzaion gustatu, jendea harroputz eta harro bihurtzen ari zela uste baitzuen. Orduan, haiek zigortzea erabaki zuen, eta, horretarako, jendeak hizkuntza bakarrean hitz egin ordez, hainbat hizkuntzatan banatu zituen; hartara, ezin zutenez elkar ulertu, dorrea eraikitzeari utzi behar izan zioten eta mundu osoan sakabanatu ziren.

Babelgo Dorrearen istorioa munduan hainbeste hizkuntza ezberdin zergatik dauden azaltzeko eta umiltasunari eta lankidetzari buruzko lezioa irakasteko erabiltzen da.

Bibliaren euskarazko bertsioa

Hona hemen Elizen Arteko Bibliako bertsioa:

«

Babelgo dorrea

Garai hartan mundu guztiak hizkuntza eta mintzaira berberak zituen. Ekialdetik etorririk, gizonek lautada bat aurkitu zuten Xinear lurraldean eta bertan kokatu ziren. Híñela esan zioten elkarri: «Ea, adreiluak egin eta sutan erre ditzagun». Honela, harriaren ordez adreilua erabili zuten eta kare-orearen ordez bikea. Gero, esan zuten: «Ea, eraiki ditzagun hiri bat eta zerurainoko dorre bat. Ospetsu egingo gara eta ez gara munduan zehar barreiatuko».

Jaitsi zen Jauna gizasemeak eraikitzen ari ziren hiria eta dorrea ikustera, eta esan zuen: «Hara, guztiak herri bat bera dira, hizkuntza bat berekoak. Hau beren lehenengo lana badute, ez zaie aurrerantzean egin nahiko duten ezer ezinezko gertatuko. Jaitsi eta nahas diezaiegun, bada, hizkuntza, elkar uler ez dezaten».

Horrela, Jaunak handik bota eta mundu zabalean sakabanatu zituen; hiria eraikitzeari utzi egin behar izan zioten. Horregatik, Babel —hau da, «Nahasketa»—, eman zioten izena, han nahasi baitzuen Jaunak mundu osoko hizkuntza eta handik sakabanatu baitzituen mundu zabalera.

»

—Elizen Arteko Biblia. HASIERA 11.(1-9)