Ekainaren 11tik 25era egingo den Nazioarteko Egunen editatoiaren bidez, Wikipedian garrantzi unibertsaleko kausei buruz ematen den informazioa hobetu nahi da gaztelaniazko, portugesezko, katalanezko, euskarazko, galizierazko eta asturierazko bertsioetan.
2022ko ekainaren 7a. - Nazio Batuek egunak eta asteak ematen dituzte gertaerak oroitzeko eta garrantzi globaleko gaiei buruzko kontzientzia sortzeko. Nazioarteko 185 egun dira, hainbat kausa sustatzeko hartzen direnak eta NBen Batzar Nagusiak adostutako egunetan ospatzen direnak.
Horien artean daude, adibidez, Nazioarteko Braille Eguna, Hezkuntzaren Nazioarteko Eguna, Uraren Munduko Eguna, Irratiaren Nazioarteko Eguna, Autismoari buruzko Kontzientziazio Eguna, Ama Hizkuntzaren Nazioarteko Eguna, Paludismoaren Munduko Eguna edo Emakumearen Nazioarteko Eguna.
185 egun ofizialetatik batzuek Wikipedian artikulua dute, beste batzuek ez. Kopurua desberdina da entziklopediaren hizkuntza-bertsio batetik bestera. Edukien arrakala hori murrizteko eta NBen Nazioarteko Egunek aldarrikatzen dituzten kausei ikusgarritasuna emateko, hainbat hizkuntzatan online editatzeko proposamena egiten dugu.
Nazioarteko Egunen Editatoia bultzatzen dutenak Wikimedia Españak, Wikimedia Portugalek, Amical Wikimediak, Euskal Wikilarien Kultura Elkarteak, Galipediak eta Wikipedia n 'asturianu dira; ekainaren 11tik 25era bitartean egingo da modu birtualean, gaztelaniazko, portugesezko, katalanezko, euskarazko, galizierazko eta asturierazko artikuluak sortu edo hobetzeko.
Nazioarteko Egunek halako gai bati buruzko sentsibilizazio-jarduerak sustatzeko aukera ematen dute. Gizarte zibileko, hezkuntza-sektoreko, tokiko eta nazioarteko gobernuetako eta beste erakunde batzuetako eragileak biltzen dituzte. Horiei guztiei dei egiten zaie entziklopedia askean gai horiei buruzko informazioa eta ikusgarritasuna areagotzeko, are pertsona gehiagorengana irits daitezen.
Wikipedia dela eta
Wikipedia ezagutza askearen iturri bat da mundu osoan. Sorkuntza kolaboratiboa da, 2001ean sortu zenetik mundu osoko milioika lagunek argitaratzen baitute. Wikipedia 300 hizkuntza baino gehiagotan dago eskuragarri eta guztira 55 milioi artikulu baino gehiago ditu. Gizadiaren historiako ezagutza libreko elkarlan-bildumarik handiena da, eta gaur egun bere edukia hilean 280.000 boluntario baino gehiagok osatutako komunitate bati esker sortu eta berrikusten da.
Sortu edo hobetu beharreko artikuluen zerrenda osoa: https://meta.wikimedia.org/wiki/International_Day_Edit-a-thon_2022/Articles/eu