Wikipedia

Mintzanet

Mintzanet euskara praktikatzeko aukera eduki nahi duten pertsonei, euskara on line eta doan praktikatzeko modua eskaintzen dien egitasmoa da. Horretarako, euskaraz ongi dakien pertsona (bidelaguna) eta euskara-maila hobetu nahi duena (bidelaria) elkartuta, Internet bidezko elkarrizketak egin ditzaten, haiek adosten duten ordutegian eta maiztasun mailan.

Proiektua 2013an sortu zen. Maramama taldea hizkuntza zerbitzuak arduratzen da kudeaketaz eta Eusko Jaurlaritzaren, Gipuzkoako Foru Aldundiaren eta Donostiako Udalaren laguntza jasotzen du[1].

Funtzionamendua aldatu

Mintzanet egitasmoaren webgunearen bidez, euskara praktikatu nahi duten guztiek (bidelariek) jardun dezakete, Internet bidez (bakoitzak erabakiko du zein programaren bidez hitz egin nahi duen: Skype, Google Hangouts, WhatsAppeko bideo-deia...), beren bidelagunekin. Parte hartzeko B1 maila eduki behar dute, elkarrizketa bermatuta egon dadin.

Bestalde, bidelagunak euskaldun jantziak  dira, eta, beraien borondatez, euskara hobetzen ari direnei praktikatzeko aukera ematen diete. Baina ez dira irakasleak (bidelagunei ez zaie exijitzen euskaldun jantziak izatea baizik).

Abiapuntua astean behin ordubeteko saioa egitea da. Hala ere, bikoteko kideek erabakiko dute maiztasuna handitu ala ez.

Abantailak aldatu

Mintzanetek ez dauka helburu didaktikorik, ulermena eta mintzamena hobetzea, helburu bakarra praktika librea baita.

Euskara praktikatzeko tresna honek orain arte osatzeko zegoen gabezia bat bete du, hain zuzen ere: edozer arrazoi dela eta, aurrez aurre euskara praktikatzeko aukera edo modua ez duten guztiek Internet bidez praktikatu ahal izatea, edo aurrez aurre praktikatu arren, beste aukera bat izatea. Izan ere, aurrez aurreko saioetan euskara praktikatzen aritzeko aukerarik ez dutenei lagundu egiten die Mintzanetek: mugak gainditzen (jendearen arazo fisikoak, osasun-arazoak, denbora edo ordutegi arlokoak, distantzia mailakoak, hizkuntza isolamendukoak), askotariko euskaldunen arteko elkar ezagutza sendotzen, eta, azken batean, euskaldun kopurua handitzen.

Proiektuaren abantailak honako hauek dira:

  1. Fisikoak edo geografikoak: edozein lekutatik hitz egiteko aukera ematen du. Edozeinek har dezake parte (gaur egun 16 eta 95 urte artekoak ditugu).
  2. Ordutegiari dagozkionak: edozein momentutan egiten ahal dira elkarrizketak.
  3. Malgutasuna: bikotekidearekin egutegia adostu daiteke, baita sortzen diren gorabeherak konpondu ere.
  4. Aurrerapen-maila: saioak bi pertsonaren artekoak dira. Horri esker, urtebeteko epean, aurrerapen handia egiten dute bidelariek ulermenean eta mintzamenean, derrigortuta baitaude hitz egitera. Horren adibide: batzuk bidelari gisa hasi ziren, eta bidelagun bihurtu dira orain.
  5. Emaitzak: euskaraz hitz egiteko hasierako lotsa galtzea, jarioa lortzea eta mintzamen zein ulermen mailan maila bikaina eskuratzea. Gainera, praktika libreak hizketa-molde errealera hurbiltzen du bidelaria, ahozko hizkerara hain zuzen ere.
  6. Kohesioa eta kultura transmisioa: euskaldunen arteko harremana estutu egiten da, eta Euskal Herriko eta erbesteko komunitateen arteko harremana jorratzen da. Euskaldunen komunitatea handitzeko aukera ematen du.

Mintzanet Eguna aldatu

Mintzanet proiektuko kideek urtero Mintzanet Eguna ospatzen dute. Egun hori asko estimatzen dute erabiltzaileek bertan elkar ezagutzeko aukera izaten baitute, esperientziak trukatu eta komunitate baten parte direla sentitzeko[2].

Gainera, urteroko hitzordu hau Mintzanet Sariak emateko aprobetxatzen dute: Bidelari eta Bidelagun Onena, eta Aipamen Berezia.[3]. 2019an Alberto Elejalde (Gasteiz, 1967) izan zen nabarmendua Urteko Bidelagun moduan. Ia hasieratik parte hartzen du, eta Cortesen (Nafarroan) bizi den bere bidelariari asko lagundu dio. Urteko Bidelariaren Saria Bilboko (eta orain arte Polonian bizi izan den) Igone Leonentzat (1993) izan zen. Bilbon egon edo Polonian egon, beti saiatu da bere euskara mailari eusten eta hobetzen. 

2018an, lehenengo aldiz, Aipamen Berezia edo Ohorezko Saria ematea erabaki zuten antolatzaileek. 2019an, Maider Olarra (1974) Baden Badenen (Alemanian) bizi den donostiarrarentzat izan zen.

Mintzodromoak aldatu

Urtero, Donostiako Bagerak antolatutako Donostiako San Telmo museoko Mintzodromoetan hartzen du Mintzanetek.[4] Bertaratutakoei, aurrez aurreko egitasmoaz gain, beste aukera bat ere badagoela ikusarazten die, on line bertsioan. Horrela, Mintzodromoan parte hartzen ari den jendeari Mintzanet probatzeko aukera ematen diote, zer den eta nola funtzionatzen duen jakiteko, eta azalpen-bideoak ikusteko aukera ere izaten dute.

Mintzanet bere ahotan aldatu

Mintzaneten parte hartzen dutenen esperientziak biltzen dira Mintzanet bere ahotan atalean, bi formatutan: bai idatziz, bai bideoan. Hala, taldearen kohesioa indartzeaz gain, irakurgaiak eta entzungaiak eskaintzen dira, eta, gainera, Mintzanet proiektuaren inguruko adibideak ematen dituzte zerbitzuan murgiltzen direnei. Euskaldunen egoerak zein diren agerian jartzen dute.

Parte-hartzaileek azaltzen dute zertan laguntzen dien egitasmoak eta nola egin duten aurrera mintzamenean, ulermenean eta jariotasunean. Bestalde, laguntzaileek zer jasotzen duten eta zergatik eman duten izena ere azaltzen dute.

Hitzaldi irekiak aldatu

Hitzaldi irekiak atalean, pertsonaia ospetsuen elkarrizketak aurkitzen ahal dira. Horrela, Mintzaneteko erabiltzaileek haien elkarrizketetan lantzeko materiala eskaintzen da. Bideoan grabatu eta norberaren ogibidea eta euskara izaten dira gaiak. Pertsona famatuek euskararekin zer harreman duten azaltzen dute bertan. Mintzanet.net webgunean topa daitezke elkarrizketak eta pieza hauek mintzagai bikaina dira erabiltzaileentzat, haien saioetan aipatzeko.

Mintzanet +65 aldatu

2015. urtean, Mintzanet +65 proiektua jarri zen martxan. Euskal Herrian eta munduan zehar etxetik parte hartzen duten adineko pertsonez gain (65 urte eta 95 urte artekoak ditugu), hitzarmen bidez, Gipuzkoako eta Bizkaiko adinekoen hainbat egoitzatan dauden egoiliarrek bidelagun gisa hartzen dute parte. Gaur-gaurkoz, proiektuan dauden erabiltzaileen % 7,62 dira profil horretakoak. Proiektua txertatzeko bidean, bertako psikologoekin lan eginda, haien esanetan, onurak begi-bistakoak dira: 

  • Adineko pertsonak gai dira gauza asko egiteko; baina, gehienetan, gaztetasunari hainbesteko garrantzia ematen dion gizarte honek ez die ematen merezi duten lekua.
  • Beste norbaiti laguntzeko gai direla sentitzen dute. Eta harreman ederra sortzen da haien artean.
  • Teknologia berriekin lan egiteko aukera dute. Honek leiho bat irekitzen die: kasu batzuetan, Euskal Herriko beste herri bateko norbaitekin hitz egiten dutelako; eta beste batzuetan, atzerrian dagoen norbaitekin.
  • Arlo kognitiboa lantzen dute. Esfortzua da buruarentzat euskara hobetu nahi duen norbaitekin hitz egitea. Osasun aldetik oso egokia zaie, beraz.
  • Hizkuntza. Adineko pertsona batzuek dauden zentroetan ez daukate aukera handirik euskaraz hitz egiteko, nahiz eta beraien ama hizkuntza izan. Kasu askotan, euskaraz hitz egiteak haien sorterriarekin eta jatorriarekin harremanetan jartzen ditu berriro.
  • Haien autoestimuarentzat ere ondo datorkie. Ordura arte ezagutzen ez duten pertsona batekin harremanetan hasi baitira. Eta hizketan asteak pasatu eta gero, harreman pertsonala sortzen da.
  • Integrazioa. Adin guztietako jendearekin hitz egiteko aukera ematen die proiektu honek. Eta, horrela, belaunaldien arteko integrazioa sortzen da.
  • Kultura transmisioa. Orain arte izandako esperientziaren arabera, adineko pertsonek ez dute behar testurik saioak gauzatzeko. Euren bizimoduari buruz hitz egiten dute. Eta, beraz, Harreman horretan kultur transmisio handia dago. Hala, onuradunak bidelaguna zein bidelaria izan ohi dira.

Erreferentziak aldatu

  1. ↑ https://www.noticiasdegipuzkoa.eus/actualidad/sociedad/2013/07/14/hitzekin-jolasten/276643.html
  2. ↑ https://sustatu.eus/1542810472
  3. ↑ VI. Mintzanet Sariak banatu ditugu Durangon. .
  4. ↑ Euskararen Eguneko Donostiako mintzodromoan hartu dugu parte!. .

Kanpo estekak aldatu

"https://eu.wikipedia.org/w/index.php?title=Mintzanet&oldid=8703497"(e)tik eskuratuta