Ladis Galartza

Artikulu hau Galartza III.ari buruzkoa da; haren semea (1990ean jaioa) gaitzat duena beste hau da: «Galartza VII.a»

Galartza III.a

Izen osoa:	Ladislao "Ladis" Galartza Etaio
Jaiotza data:	1960ko maiatzaren 13a (64 urte)
Jaioterria:	Baraibar (Nafarroa Garaia)
Pilotaria
Modalitatea:	esku huskako pilota
Egungo enpresa:	Asegarce
Postua:	atzelaria
Debutatze data:	1979ko urtarrilaren 28a
Debutatze pilotalekua:	Eibarko Astelena pilotalekua

Ladislao Galartza Etaio, pilota arloan Galartza III.a deituraz ezaguna (Baraibar, Nafarroa Garaia, 1960ko maiatzaren 13a) esku huskako pilotari profesional ohia da. Atzelari jokatzen zuen. Euskalduna da.

1978an Espainiako Gazte Txapelketako txapeldun bilakatu ondoren profesionaletan debutatu zuen. 23 urterekin esku huskako buruz buruko finala jokatzera ailegatu zen. Bost finaletara iritsi ostean, 1991n, azkenik, Retegi II.a garaituta buruz buruko txapel nagusia bereganatu zuen.

Bere garairik onenean jokalekuetan Eratsungo Aztia topatu izan ez balu, segur aski buruz buruko txapel kopurua handiagoa bereganatuko zukeen. Buruz Buruko Txapelketa Nagusian hainbeste finaletara iristeaz gainera, aipagarri dira lau eta erdikoan lortutako txapela eta bi txapeldunordetzak, eta binakakoan lortutako lau txapeldunordetzak.

Ladislao Galartzaren anaia Galartza V.a eta seme Galartza VII.a ere esku huskako pilotari profesional izatera heldu dira; 1998an eta 2009an debutatu zuten profesionaletan, hurrenez hurren, eta 2010ean utzi zion profesional izateari Galartza V.ak.

Kirol lorpenak

Buruz buruko finalak

Urtea	Txapelduna	Txapeldunordea	Tantoak	Pilotalekua
1983	Retegi II.a	Galartza III.a	22-16	Atano III.a pilotalekua
1984	Retegi II.a	Galartza III.a	22-21	Atano III.a pilotalekua
1985	Retegi II.a	Galartza III.a	22-13	Atano III.a pilotalekua
1988	Retegi II.a	Galartza III.a	22-09	Atano III.a pilotalekua
1991	Galartza III.a	Retegi II.a	22-15	Atano III.a pilotalekua
1992	Galartza III.a	Retegi II.a	22-12	Atano III.a pilotalekua
1993	Retegi II.a	Galartza III.a	22-19	Atano III.a pilotalekua

Binakako finalak

Urtea	Txapeldunak	Txapeldunordeak	Tantoak	Pilotalekua
1984-85	Bergara II.a - Martinikorena	Oreja III.a - Galartza III.a	22-18	Atano III.a pilotalekua
1986-87	Ladutxe - Tolosa	Alustiza - Galartza III.a	22-14	Atano III.a pilotalekua
1990-91	Retegi II.a - Arretxe	Salaberria - Galartza III.a	22-19	Atano III.a pilotalekua
1992-93⁽¹⁾	Etxaniz - Zezeaga	Urioraguena - Galartza III.a	22-15	Ogeta pilotalekua

⁽¹⁾ 1992-93ko denboraldian Unidas-Reur eta Asegarce eskupilotako enpresen desadostasuna zela eta bi txapelketa jokatu ziren.

Lau eta erdiko finalak

Urtea	Txapelduna	Txapeldunordea	Tantoak	Pilotalekua
1989	Retegi II.a	Galartza III.a	22-06	Atano III.a pilotalekua
1990	Retegi II.a	Galartza III.a	22-15	Atano III.a pilotalekua
1993	Galartza III.a	Eugi	22-07	Bergarako pilotalekua

Datuak: Q4895085