Juan Gil-Albert

Juan Gil-Albert
Bizitza
Jaiotzako izen-deiturak	Juan de Mata Gil Simón
Jaiotza	Alcoi, 1904ko apirilaren 1a
Herrialdea	Espainia
Heriotza	Valentzia, 1994ko uztailaren 4a (90 urte)
Hezkuntza
Hizkuntzak	gaztelania
Jarduerak
Jarduerak	poeta eta idazlea
Jasotako sariak	ikusi honorary doctor of the University of Alicante (1985) ; Arte Ederretako Merituaren Urrezko Domina (1984) ;
Genero artistikoa	olerkigintza

Juan Gil-Albert (Alcoy, Alacant, 1904ko apirilaren 1a - Valentzia, 1994ko uztailaren 4a) espainiar olerkari eta idazlea izan zen.

Biografia

Zuzenbidea eta Filosofia eta Letrak ikasi zituen Valentzian eta Madrilen, baina amaitu gabe utzi zituen bi karrerak. Bere obren artean, olerkigintzaren alorrean egindako lana da, batez ere, nabarmentzekoa. Gil Alberten olerkigintzan modernismoaren kutsua nabarmendu zen lehenengo urteetan, baina hasieratik erakutsi zuen, orobat, abangoardiaren eta, batez ere, surrealismoaren eragina. Joera horiei jarraituz idatzi zituen bere lehen olerki-liburuak, Misteriosa presencia (1936), eduki erotikokoa eta 27ko belaunaldiko idazleen klasizismoa ageri duena, Candente horror (1936, Izu bizia) obra surrealista eta Son nombres ignorados (1938, Izen ahaztuak dira), Espainiako Gerra Zibileko esperientzia mingarriei buruzko lana. Hitz lauzko lanei dagokienez, La fascinación de lo irreal (1927, Irrealaren lilura) eta Vibración del estío (1928, Udaren dardara) argitaratu zituen lehenik, eta Espainiako Bigarren Errepublikaren garaian Crónicas para servir al estudio de nuestro tiempo (1932, Gure garaiaren ikerketaren zerbitzurako kronikak), besteak beste. Espainiako Gerra Zibileko esperientziek eragin handia izan zuten bere literaturan: erbestera ihes egin behar izan zuen gerra ondoren, eta errealitatearekiko konpromisoa eta kutsu intimista erakutsi zuen harrezkeroko bere lanetan, baita 1947an Espainiara itzuli ondoren idatzitakoetan ere. Izan ere, «barne erbeste» moduko bat bizi izan zuen urte haietan, eta egoera horretan idatzi zuen, besteren artean, El existir medita su corriente (1949, Existentziak bere korrontea hausnartzen du). Bakardadean bizi ondoren, 70eko hamarraldian agertu zen berriro, kontakizun autobiografikoekin eta oroitzapen-liburuekin, adibidez, Crónica general (1974, Kronika orokorra), Memorabilia (1975), Heracles (1975) eta Breviarium Vitae (1979).

Erreferentziak

Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2012/1/9 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.

Kanpo estekak

Archivo Juan Gil-Albert (Biblioteca Valenciana)

Wikimedia Commonsen badira fitxategi gehiago, gai hau dutenak: Juan Gil-Albert

Datuak: Q3753131
Multimedia: Juan Gil-Albert / Q3753131