Euskara: Euri artifiziala

Lainoak erein. Gizakiaren ahalegina euria kontrolatzeko. Batzuetan euria eragiteko, eta beste batzuetan euria gerarazteko, gizakia saiatu da lainoak manipulatzen. Batez ere, zilar ioduroa jaurti da hodeietara horretarako. Baina sistema ez da fidagarria.

Transkribapena:

823 urtean, Tang dinastiaren garaian, lehorte handia izan zen Txinan, eta Bai Juyi, Hangzhou-ko gobernadorea Jainkoekin negoziatzera irten zen. Euria eragiteko eskatu zion Herensuge Beltzari. Hiru egunetan euririk egin ezean, Herensugeari jainkotasun-maila jaitsiko zion, Jainkoek ez baitute berezkoa dohain hori.

Hamabi mende geroago, Pekinen, 2008ko Joko Olinpikoen inaugurazioa baino lau ordu lehenago txinatarrek zilar ioduroarekin bonbardatu zituzten hodeiak, euria estadioan izan beharrean beste edozein tokitan bota zezaten. Lainoak erein zituzten, eta estadioan ez zuen euririk egin.

Baina ezin da jakin euria horren ondorioa izan zen ala ez. Zilar ioduroaren partikulek izotz-partikulen antza dute; elkarri lotzen zaizkio hodeietan, eta lurrerantz erortzen dira likido bihurtuta. Euria. Hala ere, Munduko Meteorologia Erakundeak dio ioduroa ez dela beti eraginkorra. Litekeena da euria berez sortu izana.

Zilar ioduroa edo CO2 solidoa erabilita, mundu osoan saiatu izan dira euria kontrolatzen, baina zaila da. Australian, adibidez, bertan behera utzi zuten lainoak ereiteko ikerketa. Ikerketak euria ugaritu beharrean, konspirazio-teoriak ugaritzen ditu. Esaten dute Woodstock-eko kontzertuan euria eragin zuela Estatu Batuetako gobernuak. Eta Vietnamgo gerran montzoia luzatu zuela. Zaila da sinesten.

Gaur egun, euria eta elurra eragiteko saiakerak egiten dira. Hegazkinek airetik eta kanoiek lurretik, lainoak ereiten dituzte, emaitza handirik gabe. Eta eskerrak. Pentsa nolakoa izango litzatekeen meteorologoen lana arrakasta izanez gero.