Euskara: Begiaren migrazioa

Migrazioa arrainetan. Batetik, migrazio geografikoa, bestetik migrazio bertikala eguneko zikloarekin eta azkenik, gorputz-atalen migrazioa. Adibidez, itsas hondoko arrainen begien migrazioa. Pleuronektiformeak.

Transkribapena:

Migrazioa hitz aproposa da arrainentzat. Ez guztiak, baina espezie asko, toki batetik bestera mugitzen dira. Atunak, izokinak edo marrazoak, esate baterako, leku batetik bestera joaten dira, eta leku esaten dugunean itsaso batetik bestera esan nahi dugu. Eta ez dira bakarrak. Arrain migratzaile asko daude ozeanoan.

Baina mapan marraz dezakeguna ez ezik, beste migrazio-mota bat ere egiten dute arrainek. Sakonera batetik besterako migrazioa da, egunaren eta gauaren zikloaren barruan. Fitoplanktona eta zooplanktona gora eta behera ibiltzen dira, batzuetan argi bila eta beste batzuetan elikagai bila. Eta planktonaren atzetik, arrainek ere antzeko bidaia egiten dute.

Eta arrainentzat, migrazio hitza beste arrazoi batengatik ere bada aproposa. Espezie batzuetan, gorputzaren barruan gertatzen da migrazioa. Hazi ahala, begi bat tokiz aldatzen zaie. Itsas hondoko arean bizi diren arrainei gertatzen zaie: erreboiloa, mihi-arraina, oilarra eta mota bereko espezieak.

Biologoek arrain plektoneuriformeak deitzen diete, eta arrain zapalak dira. Goiko aldea areazko itsas hondoaren kolorekoa dute, bertan kamuflatzeko, eta azpialdea, aldiz, zuria izaten dute. Baina hori helduak direneko itxura da.

Oso bestelako itxurarekin jaiotzen dira, nolabait esateko, arrainen ohiko diseinuarekin. Larbak direnean, bi alde simetriko dituzte, begiak alde banatan dituztela, eta larba izateari utzi baino lehen, begi batek beste aldera migratzen du eta simetria apurtzen da. Esandakoa, migrazio hitza oso-oso aproposa da arrainentzat.