Dorita Ruiz
Dora "Dorita" Ruiz Cejudo (Burgos, Espainia, 1944ko maiatzaren 9a) maistra eta pedagogoa. Irakasle aitzindaria izan zen adimen-urritasundun ikasleak eskoletan integratzen. Eskolen arteko koordinazioaz arduratzeaz gain, familien sostengu ere izan zen. Eusko Jaurlaritzaren Hezkuntza Bereziko Plana diseinatzen parte hartu zuen, baita Gorabide elkartearen sorreran ere.
| Dorita Ruiz | |
|---|---|
 | |
| Bizitza | |
| Jaiotza | Burgos, 1944ko maiatzaren 9a (79 urte) |
| Herrialdea |  Araba |
| Hezkuntza | |
| Hizkuntzak | gaztelania |
| Jarduerak | |
| Jarduerak | pedagogoa eta irakaslea |
Biografia aldatu
Lehen urratsak aldatu
Burgosen jaio zen Dorita, baina aita errepublikarra zen, eta han ez zioten lan egiten uzten, horregatik, Arabako Gaubea herrira joan ziren bizitzera, Doritak 3 urte zituenean. Aita herriko eskolako irakaslea izan zen. Geroago, Madrilera joan zen, bere ahizpa guztiekin, barnetegi batera, eta han egon zen Magisteritzako lehenengo maila egin arte. Ondoren Bilbora etorri zen. Hasieran oso zaila egin zitzaion ohitzea. Euskararik ere ez zekien. Magisteritza bukatu zuen udan ordea. Deustuko Unibertsitatean eman zuen izena oinarrizko euskara ikasteko. Euskara ikasi, ezkondu eta Euban jarri zuen bere bizitokia.
Ikasketak aldatu
Magisteritza ikasketak egin zituen. Madrilen hasi eta Bilbon amaitu zituen. Era berean, Pedagogia Terapeutikoko ikasketak burutu zituen Madrilen, Espainiar Estatuko lehenengo promozioko lizentziaduna izan zen arlo honetan.[1]
Ibilbide profesionala aldatu
Eskola aldatu
Lehen urteetan Karrantzan eta Portugaleten aritu zen maistra lanean, harik eta, Soriako Berzosa herrira joatea egokitu zitzaion arte. Bi ume soilik zituen eskola hartan.
Hezkuntza berezia aldatu
Otxarkoaga aldatu
Hezkuntza Berezian Otxarkoagan eman zituen lehen urratsak. Bizkaian Sondikako La Ola zentroa baino ez zegoen adimen urritasuna zuten ikasleentzat, baina ikasle jakin batzuk soilik hartzen zituzten bertan. Orduan, irakasle batzuk batu, eta Auxilio Social elkarteko falangista bat konbentzitu zuten Bizkaian halako ikasleentzako zentroak sortzeko. Bilboko Otxarkoaga auzoan tokia aurkituz gero utziko zietela esan zien. Pisu bat aurkitu, eta etxez etxe ibili zen auzoan haurren bila. Ezagutzen den Downen sindromea zuen lehen ikasle ijitoa izan zuen bertan.
Durango aldatu
Otxarkoagatik Durangora General Varela zentrora. Zuzendaria falangista zen, eta, Doritaren seme-alabak ikastolara joaten zirela konturatu zenean, astebete eduki zuen zuzendaritzako atean eserita. Hastapenak latzak izen ziren. Dena zegoen egiteko eta baliabideak urriak ziren. Goizeko bederatzietatik arratsaldeko bostak arte egiten zuten lan. Bazkaltzen ematen zieten umeei, eta askotan kozinatu ere irakasleek egiten zuten. Taxian heltzen ziren ikastetxera Durangalde osoko berrogei ikasle inguru.
Gorabide aldatu
1980ko hamarkadan, Gorabideren Durangaldeko Elkartearen sorreran parte hartu zuen. General Varela eskolan lan egin zuen sasoian harremana izan zuen ikasleen gurasoekin, hau da, inplikazioa zuen. Gurasoek sareak egin eta elkartea sortu zuten, beharrizanei irtenbidea emateko, baina profesionalen laguntza ere eskatzen zuten. Horregatik, Durangaldeko Gorabideko arduradun ibili zen Dorita denbora batez.
Teknikari eta kudeatzaile aldatu
1982an Eusko Jaurlaritzak abiatu zuen Hezkuntza Bereziko Planaren egituraketan parte hartu zuen, eta 1992ra arte Bilboko Hezkuntza Ordezkaritzan lan egin zuen, teknikari eta kudeatzaile gisa. Ostean, Durangoko Landako eskolan eman zituen klaseak eta azken urtean Durangoko Berritzeguneko talde multiprofesionalean hartu zuen parte. 2004an erretiratu zen. [2] [3]
Sariak aldatu
- 2019ko ekainaren 8an Hezkuntza Berezian egindako lana aitortu zion Gerediaga elkarteak Durangaldeko Teila emanez. Gerediagako foru-zelaian egin zen ekitaldian. Durangaldeko Teila saria bi urterik behin banatzen du Gerediagak, Durangoko Merinaldetik kanpokoek eskualdearekin duten lotura aitortzeko. [4] [5] [1] [6] [7] [8]
Erreferentziak aldatu
- ↑ a b «Dorita Ruiz irakasleak Durangaldeko Teila Saria jasoko du» El Correo 2019-06-05 (Noiz kontsultatua: 2020-03-02).
- ↑ Larrinaga, Zihara Jainaga. ««Eskolak aldatu behar du, eta ez adimen urritasuna daukan ikasleak»» Berria (Noiz kontsultatua: 2020-03-02).
- ↑ «Durangaldeko Teila Saria Dorita Ruiz irakasleak jasoko du - Gerediaga Elkartea» www.gerediaga.eus (Noiz kontsultatua: 2020-03-02).
- ↑ dotb.eus (Noiz kontsultatua: 2020-03-02).
- ↑ «Dorita Ruiz recibe el sábado el premio 'Durangaldeko Teila' por su labor en la Educación Especial» Mugalari Kultura 2019-06-04 (Noiz kontsultatua: 2020-03-02).
- ↑ «Durangaldeko Teila Saria Dorita Ruiz irakasleak jasoko dau» bizkaie.biz (Noiz kontsultatua: 2020-03-02).
- ↑ «Durangaldeko Teila Saria Dorita Ruiz irakasleak jasoko du - Gerediaga Elkartea» www.gerediaga.eus (Noiz kontsultatua: 2020-03-02).
- ↑ «Dorita Ruiz irakasle ohiak Durangaldeko Teila saria jaso du - Durangaldea» Anboto.org (Noiz kontsultatua: 2020-03-02).
Datuak: Q83799136
