Txikipedia:John Lennon

John Lennon abeslari ingelesa zen eta 60ko hamarkadako Beatles pop taldeko kide izateagatik egin zen ospetsu. Banandu ondoren, bakarkako karrera arrakastatsua izan zuen, 1980an hil egin zen.

John Winston Lennon Liverpoolen (Ingalaterra) jaio zen 1940ko urriaren 9an, Bigarren Mundu Gerrako alemaniarren bonba eraso baten erdian. Aitak familia utzi ondoren, bere izeba Mimik hazi zuen. Johnek 17 urte zituenean ama hil zitzaion istripu batean.

Ingalaterrarentzat garai zailak izan ziren gerra sasoia eta gerraostea. Jende asko hil zen eta janaria eta arropa mugatu zituzten. 50eko hamarkada amaieran nerabeek askatasun berri bat aurkitu zuten gerraren tristura eta zoritxarretik kanpo. Haien diskotekak, moda eta musika zituzten. Johni artea eta musika interesatzen zitzaizkion. Hamabost urte zituela Quarrymen izeneko pop talde bat sortu zuen. Liverpoolen arte eskola batera ere joaten zen.

The Beatles

Lennonek 1957an ezagutu zuen Paul McCartney. Lagunak egin ziren, eta McCartney Quarrymen taldera batu zen. Hurrengo urteetan beste kide batzuk iritsi ziren taldera eta izena ere aldatu zioten. 1962an taldearen izena The Beatles zen. Beste kideak George Harrison eta Ringo Starr ziren. Laurak batera 60ko hamarkadako talderik arrakastatsuena izatera heldu ziren. Munduan zehar ibili ziren eta hainbat filmetan ere agertu ziren.

1962an, Lennon bere arte eskolako neska-lagun Cynthiarekin ezkondu zen, eta hurrengo urtean seme bat izan zuten. Geroago, Yoko Ono artista eta musikaria ezagutu zuenean, Cynthiarengandik dibortziatu zen eta 1969an, Onorekin ezkondu zen. 1970eko apirilean Paul McCartneyk taldea utzi zuen eta zortzi hilabetetara the Beatles taldea ofizialki banatu zen.

Bakarkako ibilbidea

Lennonek bakarkako ibilbideari ekin zion eta munduko bakearen aldeko kanpainan sartu zen. 1971an Imagine izeneko albuma argitaratu zuen eta munduko musika zerrenda guztien lehen postuan jarri zen.

1980ko abenduaren 8an, bere New Yorkeko apartamentura itzultzen ari zela jarraitzaile batek tiroz hil zuen. Haren erailketak atsekabe handia eragin zuen mundu osoan. Jarraitzaileak lur jota geratu ziren berria entzutean. Lennonen musikak mundu osoko jende asko inspiratzen du oraindik.