Drone

Droia gidaririk gabeko hegazkin bat da (ingelesez, Unmanned Aircraft Vehicle UAV). Nahiz eta droiek erabilpen zibila eduki, beste behar batzuetarako ere erabiltzen dira, ala nola, lan militarrerako, kazetaritzarako, ikerketa zientifikoentzako eta nekazaritzarako. Ibilgailu hauek hegaldi kontrolatu bat egiteko gai dira, erreakzio edo errekuntza motorrekin propultsatuta.

Droiek, forma, tamaina, konfigurazio eta diseinu ezberdinak eduki ditzakete. Historian zehar, ibilgailu hauek lurretik kontrolatuak izan dira, baina gero eta gehiago erabiltzen dira kontrol autonomoan. Horrela, bi azpi multzo sortu dira: alde batetik, kokaleku jakin batetik gidatu eta kontrolatuak direnak, eta aurrez programatutako hegaldiak dituzten kontrol autonomokoak. Azken hauek, automatizazio sistema dinamiko konplexuagoak erabiltzen dituzte.

Historia

Esan daiteke tripulaziorik gabeko ibilgailu hauek, tripulatutako sistemak bezain zaharrak direla. Abiazio sektorean berrikuntza bat zegoen bakoitzean, oso denbora gutxian probak egiten ziren tripulaziorik gabeko sistemetan. Sistema hauen lehenengo erabilera ezaguna 1849. urtekoa da. Austriarrek globo ez tripulatuak erabili zituzten Venezia erasotzeko, baina ez zuten arrakastarik izan.

Oro har, gidaririk gabeko sistema hauek mundu militarrarekin egon dira lotuta. Gaur egun ezagutzen ditugun droiak ezagunak egin dira hogeigarren mendeko 30. hamarkadan britainiarrek eginiko garapen batzuen ondorioz. Britainiar armadak “Queen Bee”(ingelesez, erle-erregina esan nahi duena) sistema garatu zuen. Teknologia hau Estatu Batuetara zabaltzean, “Droi” izena ezarri zioten (ingelesez erlamando esan nahi duena). Baina sektore honen benetako gorakada Afganistaneko gerraren ondorioz etorri zen.

Hortik aurrera, sektore militarraz gain, mundu zibilera zabaltzen hasi ziren. Japonia izan zen droien garapen komertzialak egiten hasi zen lehenengo herrialdea. Hain zuzen, 80. hamarkadan, Yamaja enpresak laboreen ernalkuntzarako sistema bat garatzeko eskaera bat jaso zuen gobernuko nekazaritza departamentutik.

Sistema hauek garatzen hasi zen hurrengoa Europa izan zen. 2009. urtetik aurrera Europan garapen komertzial hauek gorakada handia izan zuten. Gaur egun, sektore honetan 5.000 enpresa baino gehiago daude. Europa beste lurraldeekin alderatuz oso aurrean dago arlo honetan.

Droien erabilpenak

=== Kazetaritza ===

Droiek kazetaritza munduan erabilpen anitzak dituzte. Garrantzitsuenetarikoak argazkiak eta heltze zaileko lekuetako informazioa eskuratzea dira, adibidez, hiri baten argazki panoramikoa zerutik ateratzea. Gudak eta konflikto belikoak dauden lekuetan kazetaritza tradizionala oso arriskutsua denez, droiak erabiltzen dira informazioa, grabaketak eta argazkiak segurtasun gehiagorekin eskuratzeko.

=== Ikerketa zientifikoak ===

Droiek erabilpen asko dute zientzia arloan. Geologia eta biologiaren ikerketetan dokumentazioa lortzeko erabiltzen dira; esaterako, animaliak askatasunean jarraitzeko, eta baita zientzialarientzako iristezinak diren lekuetara heltzeko ere.

=== Erabilera militarrak ===

Droi militarrak bi taldeetan sailkatu ditzakegu: ez-armatuak eta armatuak. Ez-armatuak maparen azterketak egiteko eta taktika militarrak koordinatzeko erabiltzen dira. Armatuak bestalde, objektibo militarrak erasotzeko erabil dituzte.

=== Legea betearazteko ===

Azken urte hauetan, droien erabilpenak segurtasun-instituzioen modernizazioa ekarri du. Hauek erabilera anitzetarako onuragarriak izan daitezke. Polizia esparruari dagokionez, Europar Batasunak 2,6 milioi euro inbestitu ditu segurtasun droietan. Hauen zeregina Europako mugaldetan legez kanpoko immigrazioa eragoztea da.

Espainian, DGT (euskaraz, trafiko zuzendaritza nagusia) instituzioak droien erabilpena ikertzen hari da, helikopteroaren ordez bide-segurtasuneko zereginetan erabiltzeko, droiak eraginkorragoak eta merkeagoak baitira.

=== Nekazaritzan ===

Sailak ondo zainduta mantentzea oso lan zaila da, eta azken urte hauetan droiek lan hori apur bat erraztu diete nekazariei. Droiei esker, klima aztertzea edo eta landaketak zehaztasun handiagoarekin zaintzea errazagoa bihurtu da. Horrez gain, lur-sailak azkarrago eta zehaztasun handiagoarekin fumigatzeko ere erabiltzen dituzte, emaitza hobeak lortuz.

Adibidez, batzuetan mahastiak tratatzeko eta ekoizteko droietaz baliatzen dira, eraginkortasunagatik eta prezio merkegatik.

Abantailak

• Leku arriskutsuetara pertsonak eramatea ez da beharrezkoa.
• Ibilgailu hauek merkeagoak dira tradizionalekin aldaratuz.
• Abiadura handiagatik distantzia luzeak egin dezakete.
• Automatizatu edo lurretik kontrolatu daitezke.

Desabantailak

• Airean dauden bitartean hackeatuak izan daitezke.
• Erabiltzaileak agindu bat ematen duenetik droiak jasotzen duen arte atzerapen bat egoten da, hau da, agindua ez da momentuan betetzen.
• Eguraldi-baldintzak oso garrantzitsuak dira. Kasu batzuetan, eguraldi txarra egonez gero, droia ezin izango da erabili.