Ondasun

Ekonomian, ondasuna behar bat asetzen duen zerbait da, edota gehiago edukitzea nahi den zerbait da. Definizioa lausoa da eta aldi berean garrantzitsua. Ondasunaren definizio zehatza kontsumitzailearen eskaeraren eremua zehaztuko du eta hortik ekonomia-zientzia osoa. Ez dago, ordea, adostasunik ondasun ekonomikoaren definizioaren gainean: zerbait hori homogeneoa den edo hainbat ondasun mota dauden, asetzen dituzten beharrak nolakoak diren, ondasuna izateko prezio bat ordaindu edo lana egitea beharrezkoa den, ondasunaren eskasia edo kopuru mugatua izan behar den. Galdera hauek guztiek garrantzitsuak dira ekonomian. Adibidez, ondasuna den zerbait hori homogenoa bada ondasun mota guztietarako, ondasun bakoitzari balioa eman edo baloratzearen arazoa sortzen da.

Adiera zabalean, ondasunak ekoizten diren eta beharrak edo desirak asetzen dituzten gauza fisikoak (liburu bat, adreilu bat) zein zerbitzuak (ile-apainketa bat) dira. Adiera hertsian, ondasunak eta zerbitzuak bereizten dira eta horrela, ondasunak beharrak edo desirak asetzen dituzten gauza fisikoak direla esaten da eta zerbitzuak kontzeptua materialak ez diren gauzetarako uzten da.