Siamdar katu
Siamdar katua (thailandieraz: วิเชียรมาศ) katu-arraza bat da.
Katu-arraza honetan, bi barietate bereizten dira: batetik, katu siamdar modernoa edo «katu siamdarra» —zentzu hertsian esanda—; bestetik, katu siamdar tradizionala edo «thai» katu siamdarra.
Zenbait ezaugarri partekatzen dituzte katu siamdar modernoak eta tradizionalak, adibidez, kolore-patroia eta ile motza. Kolore ilunagoa izaten dute gorputz-tenperatura txikiagoa den lekuetan, hau da, zangoetan, buztanean, aurpegian eta belarrietan. Alabaina, ezberdinak dira haien burua eta gorpuzkera.
Siamdar katu tradizionala aldatu
Barietate honen jatorria garai bateko Siam erreinuan dago, gaur egungo Thailandian. Hango errege-erreginekin bizi omen ziren; izan ere, izaera purua egozten zieten, katakumeak jaiotzen direnean zuri-zuriak izaten baitira, Siamgo kolore sakratukoak.
Katu siamdar tradizionalaren bereizgarri nagusia da forma biribilak dituela. Gorpuzkera trinko eta biribila du, masail bete-beteak, mutur motza, begi urdin luzexkak eta buztan ertain edo motza. Belarri eta begi handi samarrak izaten ditu.
Siamdar katu modernoa aldatu
Katu siamdar modernoa ere Siam erreinuko arraza da, katu siamdar tradizionalaren ondorengoa. 1880an eraman zen Ingalaterrara, eta, 1890ean, Amerikako Estatu Batuetara. 1950etik aurrera, sona handia hartu zuen katu-erakusketetan. Horregatik deituko zaio, beharbada, «siamdar» katu siamdar modernoari, barietate modernoa izan baitzen lehiaketetan ibili zena.
Katu siamdar modernoa dotorea, liraina, malgua eta gihartsua da. Triangelu formako burua du, mutur fina, arbendola-itxurako begiak, belarri handiak, lepo mehe eta luzea eta gorpuzkera eta buztana ere luzeak.
Izaerari dagokionez, oso lagunkoia, taldekoia eta txeratsua da, baina argi eta garbi adierazten du kontent ez dagoela gustuko ez dituen egoeretan. Jakin-nahi handia izaten du, eta inguruan gertatzen diren aldaketa guztiak aztertzen ditu. Arina da, eta oso bizia; nekaezina dirudi, korrika eta saltoka ibiltzen da etxe guztian barrena.
Kanpo estekak aldatu
Datuak: Q42604
Multimedia: Siamese cats / Q42604
